Саботната програма во Ла Лига завршува со големото мадридско дерби, во кое второпласираниот Атлетико е домаќин на лидерот во лигата Реал Мадрид. Двете екипи се на лидерските позиции и покрај слабите партии, па овој меч може да биде увертира за победничка серија кај евентуалниот победник.
Двете екипи се во слаба форма, а повторно се на врвот
Само еден бод ги раздвојува двата тима на табелата. И едните и другите не се наоѓаат во добра форма, но повторно се на водечките позиции и тоа само благодарение на очајната Барселона. И покрај нивните позиции на табелата, црвеното светло е запалено во двете екипи. Слабите резултати и игри можеби се должат на тоа што обајцата менаџери се обидуваат да асимилираат голем број на нови играчи во своите екипи. Реал Мадрид е без пораз, но изгуби бодови во ремињата против Ваљадолид и Виљареал. Атлетико пак имаше очајна партија против Сосиедат и доживеа пораз од 2:0 пред две кола, по што следеше разочарувачко реми со Селта дома и конечно победа минатото коло кај Мајорка.
На Атлетико му фали Гризман
Атлетико конечно славеше победа во средата кога ја совладаа Мајорка со 0:2. Играта беше добра, но и покрај тоа далеку од она што сите го очекуваа од нив сезонава. Симеоне сака да остави впечаток дека Гризман нема да фали премногу сезонава, но барем досега ситуацијата е сосем спротивна. Да, тие сега го имаат Жоао Феликс кој прераснува во голема ѕвезда, но не можат веднаш по неговото доаѓање да се потпрат на неговите индивидуални квалитети. Можеби да се работеше за друга екипа тоа ќе поминеше, но Симеоне во Атлетико го наметна тимскиот дух пред индивидуалниот и сега не сака да го промени тоа. Затоа велам, на Феликс кој има само 19 години ќе му треба време и простор да го заслужи епитетот – замена за Гризман.
Зидан го ротираше тимот, неговите фудбалери се многу посвежи
Екипата на Зинедин Зидан треба да биде свежа за натпреварот со Атлетико, откако Зизу ја искористи можноста да одмори неколку играчи на средба. Но тоа, веројатно е единствената предност за нив на овој меч. Бензема, Карвахал, Хазард, Родригез и Варан се враќаат во првиот тим и тоа свежи и јасно е дека одбраната на Атлетико ќе има полни раце работа. Зидан се обидува да направи место во првиот тим и за Јович, но тешко е да се видат заедно со Бензема, особено од првата минута. Она што е случај со Феликс во Атлетико, истото се случува и со Хазард во Реал. Тој одигра три натпревари за Реам досега, но искрено е далеку од своите игри кои ги прикажуваше во дресот на Челзи. Сепак, тој се врати по повреда, а во минатото секогаш знаел да блесне против најсилните, па нема причина да не веруваме дека тоа може да се случи токму на овој меч.
Be the first to comment