Многу очекуваната пресметка во осминафиналето од Лигата на шампионите меѓу Аталанта и Реал Мадрид се игра во среда, на Гевис стадионот во Бергамо.
Избраниците на Гасперини завршија на втората позиција во групата Д и обезбедија место во нокаут фазата, додека Реал Мадрид беше на врвот во групата Б по несигурниот почеток на сезоната.
Аталанта во одлична форма оваа година
Да се играше овој натпревар пред неколку години, од Реал Мадрид ќе се очекуваше да ги декласира италијанците без никаков проблем. Сепак, огромниот подем на Аталанта ги надмина сите очекувања, па не е случајно што многумина веруваат дека оваа екипа може да го мине шпанскиот гигант.
Првата сезона на Аталанта во Лигата на шампионите минатата сезона заврши со четвртфинале по поразот од финалистот ПСЖ, но фудбалерите на Гасперини сезонава покажаа дека тоа не било случајно.
Беа во тешка група со Ливерпул и Ајакс, а имаа само два бода помалку од англискиот шампион, над кого славеа на гости со 0:2 и имаа четири бода повеќе од Ајакс.
Аталанта во тој период играше слабо во Серија А, а почетокот на сезоната беше загрижувачки за нив. Но од последниот меч во групата и победата над Ајакс, Аталанта има само еден пораз на 18 натпревари и тоа против Лацио во Јануари. Во меѓувреме обезбедија пласман во финалето на Купот на Италија и се искачија до 6-то место во Серија А, каде и сезонава амбициите се пласман во Топ 4.
Тоа значи дека овој меч со Реал доаѓа во добро време за нив, особено по победата викендов над Наполи со 4:2. Атмосферата е на високо ниво, а Гасперини ќе се обиде тоа да го искористи за добар резултат на првиот меч во Италија.
Зидан со големи проблеми
Повеќегодишното владеење на Реал Мадрид во Лигата на шампионите во изминатата деценија брзо стана минато кога загубија од Шахтјор Доњецк во нивниот прв дуел сезонава во Европа. Во второто коло повторно киксираа играјќи 2:2 со Менхенгладбах. Но и покрај тоа што загубија и на вториот меч со Шајхтор завршија на лидерското место во својата група каде беше и Интер.
Од нивниот последен триумф во Лигата на шампионите во сезоната 2017-18, Реал Мадрид во оваа фаза беше поразен од Ајакс, односно Манчестер Сити, а овој пат десеткуваниот тим на Зидан не смее да си дозволи уште едно испашање во оваа фаза.
Шампионот во Ла Лига успеа да победи на последните четири меча и покрај сериозните проблеми во тимот со повреди, но во Бергамо ќе биде тешко. Зидан не може да смета на Бензема, Карвахал, Хазарт, Марсело, Милитао, Рамос, Родриго и Валверде. Тоа е речиси цела постава, а во таков случај проблем ќе биде и заморот поради малиот фонд на фудбалери за ротација.
Be the first to comment