Можеби нај очекуваниот натпревар во Лигата на шампионите ќе се одигра на Џузепе Меаца во среда навечер, кога носителот на скудетото Интер ќе биде домаќин на шесткратниот европски шампион Ливерпул во првиот меѓусебен натпревар од осминафиналето.
„Црвените“ беа една од трите екипи во овогодинешното натпреварување кои ја завршија групната фаза со 100% учинок, додека „нероаѕурите“ завршија на второто место зад Реал Мадрид во својата група.
Прв нокаут меч за Интер по една деценија
Интер за прв пат по една деценија ќе игра во нокаут рундата во Лигата на шампионите. И покрај тоа што имаат големи надежите за напредок во следната фаза од натпреварувањето, тие ќе имаат тешка задача да го совладаат еден од фаворитите сезонава.
Како што споменавме претходно, тимот на Симоне Инзаги заврши на второто место во групата Д со 10 бода од нивните шест натпревари, пет бода зад победникот во групата Реал Мадрид. Нероаѕурите победија дома и на гости против дебитантот во Лигата на Шампиони – Шериф Тираспол и обезбедија четири бода од нивните две средби со Шајхтор Доњецк, но не можеа да освојат бод, ниту да постигнат гол против тимот од Мадрид.
Сепак, си ја завршија задачата и ја минаа групата за разлика од минатата сезона кога целосно разочараа. Имаа лесна група, но тешка жрепка за оваа фаза и една навистина тешка мисија со тимот на Клоп.
Четврто дерби по ред за Интер
Интер влегува во натпреварот во среда откако не успеа да победи на последните два натпревари во Серија А, губејќи со 1:2 од градскиот ривал Милан и ремизирајќи 1:1 со Наполи минатиот викенд. Овие резултати ги симнаа момците на Инзаги од лидерското место и сега се втори на табелата.
Но ова беше еден навистина тежок распоред на натпревари, особено ако се знае дека меѓу двата меча во Серија А, имаа и натпревар со Рома во Купот каде славеа со 2:0. Е веќе после мечот со Ливерпул, Интер ќе има полесно противници и повторно можност да се врати на врвот на табелата во Серија А.
Сега, Нероаѕурите ќе сакаат да се вратат на победите веќе на дуелот во среда иако традицијата е само уште еден показател дека Интер ќе има тешка задача.
Од сезоната 2003-2004, Интер е очаен против англиски екипи и интересно – сите три двомеча беа во осминафиналето. Претрпеа пораз од Ливерпул во 2007-08 и Манчестер Јунајтед во 2008-09, пред да загубат од Челзи во 2009-10.
Победничка серија за Ливерпул
Ливерпул ја продолжи својата победничка серија во сите натпреварувања на шест натпревари со победата од 0:1 во Премиер лигата на гостувањето кај последниот Барнли минатиот викенд.
Победата им помогна на момците на Јирген Клоп да се вратат на девет бода заостанување од лидерот во лигата Манчестер Сити, а „црвените“ имаат натпревар помалку. Сепак, тешко е да се верува дека титулата во Премиер Лигата е сеуште достижна.
Ливерпул сега го насочува своето внимание кон Лигата на шампионите и тие се надеваат дека ќе ги подобрат своите последни два нокаут настапи во ова натпреварување. Откако ја освоија својата шеста европска круна во 2018-19 година, „црвените“ беа елиминирани во 1/16 финалето против Атлетико Мадрид во 2019-2020 година, пред да загубат во четврт-финалето од Реал Мадрид минатата сезона.
Екипата на Клоп беше во застрашувачка форма, постигнувајќи 17 гола и победувајќи ги сите шест натпревари од групата Б, вклучувајќи ги и двете средби со ривалите на Интер, Милан. Ливерпул би можел да стане само вториот тим по Тотенхем во 2010-11 година кој победил и против Интер и против Милан во истата сезона, доколку би победил во среда или во реваншот следниот месец.
Be the first to comment