Холандија во вечерниот термин во недела игра со Украина во рамките на групата Ц во која се наоѓа и Македонија. Мечот се игра на на „Амстердам Арена“ во истоимениот град.
Освен што ја има фаворитската улога поради квалитетот и играчкиот кадар, Холандија ќе ја има предноста и на доашниот терен, но дали тоа ќе биде доволно за да се освојат првите три бода за нив на ЕУРО 2020.
Од овие две нации се очекува да напредуваат во нокаут фазата, барем кога се во прашање букмејкерите кои им ја доделија фаворитската улога во групата Ц.
И покрај проблемите Де Бур има одличен тим
Холандија има одличен тим, но немаше среќа со фудбалерите пред ЕУРО. Ако се знае дека ќе настапат на шапионатот без клучниот дефанзивец Ван Дијк, тогаш јасно е дека нивната задача да ги исполнат амбициите и очекувањата од доашната јавност е значително потешка.
Кога сме веќе кај проблемите, Де Бур претрпе голем удар по повредата на препоните на Дони ван де Бик, поради што играчот од средниот ред на Манчестер Јунајтед се повлече од составот на Холандија, додека голманот Цилесен нема да биде вклучен во тимот по позитивниот тест за КОВИД-19.
Сепак, Де Бур има одличен состав и без овие отсутни фудбалери. Депај е незаменлив во офанзивата, а по пријателските дуели пред шампионатот се чини дека тој конечно има соодветен партнер во нападот. Напаѓачот на Волфсбург – Вегхорст кој постигна 20 гола во Бундеслигата оваа сезона се наметнува како прв избор во нападот и тој ќе биде ожеби најголемото изненадување на Де Бур. Холандија немала напаѓач од таков калибар уште од времето на Ван Нистелрој, а последен сличен фудбалер беше Хунтелар. Има Де Бур одлични опции во сите линии и ако тие фудбалери одиграат на високо ниво, отсуството на Ван Дијк не треба да се осети премногу, барем во групната фаза.
Ќе има изненадувања од Де Бур
Холандија брзо се врати по разочарувачкиот нерешен резултат 2:2 со Шкотска на нивниот прв пријателски натпревар пред Европското Првенство и славеше над Грузија со 3:0 минатиот викенд.
19-годишниот Рајан Грејвенберх додаде дополнителен сјај на победата, па Роналд де Бур сигурно ќе биде во искушение со него да го започне дуелот против Украина во недела. Доколку играчот за врска на Ајакс добие доволно време за игра во текот на целиот турнир, тој има талент да се етаблира како еден од најдобрите млади играчи на турнирот.
Јасно во Холандија е само едно – Де Бур има намера да ги спари Депај и Вегхорст заедно во нападот во систем 3-5-2.
Вијналдум, секако е незаменлив во средината и е клучната алка во овој систем, а најголео прашање е кој ќе биде на голот по откажувањето на Цилесен. 38-годишниот Мартин Стекеленбург веројатно ќе биде првиот избор пред Тим Крул.
Украина полека ја враќа формата од квалификациите
Од друга страна, Украина ги доби двата пријателски дуели како загревање пред првенството и тоа против Северна Ирска и Кипар без примен гол. На првиот пријателски меч пак одиграа 1:1 со Бахреин.
Избраниците на Андриј Шевченко на седум меча по ред пред последните две победи примаа баре по еден гол, но конечно не примија гол на овие последни два меча.
Откако импресивно ја минаа квалификациската група пред Португалија и Србија, што и да е друго освен пласман во следната фаза на ЕУРО 2020, ќе се смета за неуспех.
Доколку ЕУРО 2020 не беше одложено, веројатно Украина ќе имаше поголеми шанси за успех. Сепак, изминатите 12 месеци беа разочарувачки. Испаднаа во Лигата на нации и имаа неколку киксови со послаби селекции. Се на се, тие беа во серија од седум меча без победа и имаа четири ремија по ред пред подготвителните натпревари.
Освен тоа Украина нема да може да смета на две големи ѕвезди. Поради повреда ЕУРО 2020 ќе го пропуштат Евгениј Конопјанка и Виктор Коваленко.
Очекување
Шевченко треба да донесе одлука во однос на тоа дали ќе им одговара формацијата 4-3-3 против селекција како Холандија. Со оглед на тоа што Шевченко искористи одбрана со тројца централни бекови во три квалификациски натпревари за СП во март, што им помогна да постигнат импресивно реми 1:1 против Франција, јас верувам дека Шевченко може да се реши да пристапи кон овој дуел на повнимателен начин.
Фудбалерот на Манчестер Сити, Олександар Зинченко игра на својата најпосакувана позиција во средниот ред за својата земја и целата игра ќе се врти околу него. Ќе играат подефанзивно и ќе чекаат кикс на Холандија.
Од друга страна, Холандија сака да стартува со победа на ЕУРО и на тој начин да ја истакне својата кандидатура за највисок пласман. Скромни се повеќе од вообичаено, но тоа сакаат да биде најголема опасност кон противничките екипи. Имаат предност и од домашниот терен и јасно е дека се фаворити на овој меч.
Be the first to comment