Денес во рубриката тип на денот избравме дерби меч. Барселона ќе се обиде да дојде до три последователни победи во Ла Лига по долго време, кога во недела навечер, гостува кај каталонскиот ривал Еспањол во дербито на Барселона.
Гостите моментално се петти на табелата, со само два бода помалку од третопласираниот Реал Бетис и со натпревар помалку, додека Еспањол го зазема 13-тото, без сериозни амбиции за горниот дел од табелата, но и далеку од опасната зона.
Еспањол бара само мирна сезона
Откако обезбедија враќање во Ла Лига со освојувањето на Сегунда дивизија минатата сезона, борбата на ова ниво не беше ништо ново за Еспањол. Сезонава само едно беше важно за тимот – консолидација и мирна сезона, мирна во однос на раното обезбедување на опстанокот во Ла Лига.
Од седум победи, шест нерешени и 10 порази од 23 натпревари, каталонскиот тим собра 27 бодови и имаат само три бода помалце од првите 10 екипи и покрај лошата серија. Еспањол е без победа во лигата од крајот на Декември – освои само еден бод од последните четири натпревари против Елче, Кадиз, Реал Бетис и Атлетик Билбао.
Но кога игра дома оваа екипа е сосема различна – тимот на Висенте Морено има шест победи, две нерешени и три порази од 11-те првенствени натпревари оваа сезона на домашен терен. Но традицијата во ова дерби е целосно контра нив. Еспањол има само 34 победи од претходните 173 натпревари во Ла Лига против Барселона, претрпувајќи 101 пораз во тој процес, вклучувајќи го и поразот од 1:0 во првиот овосезонски меч на Камп Ноу во Ноември.
Барса со зголемена самодоверба
Барселона забележа победа од 1:0 над Алавес на 23-ти Јануари, пред да го победи Атлетико Мадрид со 4:2 минатиот викенд во меч во кој Адама Траоре го имаше своето второ деби за клубот, како и Пјер-Емерик Обамејанг кој пристигна од Арсенал.
Тимот на Чави ги постигна сите четири гола против Атлетико во воведните 49 минути одигрувајќи импресивен меч. Дури ни црвениот картон на Дани Алвес во 69-та минута, не му помогна на Атлетико премногу.
Барселона не е во трка за титулата оваа сезона, заостанува 16 бода зад лидерот Реал Мадрид, но е во силна позиција да обезбеди пласман во топ четири, а ќе се стремат и кон успех во Лига Европа.
Напорниот крај на Февруари ќе му донесе на тимот два меча со Наполи во Лига Европа, покрај првенствените натпревари против Еспањол, Валенсија и Атлетик Билбао. Тоа е тежок распоред кој ќе даде одговори на многу нешта околу Барса. Но едно е јасно уште сега – настапот против Атлетико минатиот меч сигурно ја зголеми самодовербата кај фудбалерите, но и кај симпатизерите на клубот.
Be the first to comment