Гаспром Арената во Санкт Петербург ќе биде домаќин на третиот меч од вториот ден на ЕУРО 2020. Во терминот од 21:00 часот по македонско време, домаќинот Русија ќе игра против еден од фаворитите на Европското првенство, Белгија во рамки на групата Б.
Избраниците на Роберто Мартинез цврсто гледаат кон трофејот како рангирана селекција број еден во светот, додека Русија има реални очекувања за пласман, барем во следната фаза на шампионатот.
Белгија сака титула
Четириесет и една година од нивниот неуспешен потфат на шампионатот во 1980 година – на кој Белгија стана жртва на тогашната моќна генерација на Западна Германија во финалето – Белгија повторно има селекција која ќе се бори за титулата.
Ова е можеби последната шанса за златната генерација на Белгија да освои трофеј, барем кога во прашање е Европското Првенство. Догодина последна шанса ќе имаат на Светското Првенство. Белгија се квалификуваше на ЕУРО со освоени 30 од можни 30 поени, како најуспешна селекција во квалификациите. Болката од 2016 година се уште постои во сеќавањата на играчите, кога Велс го направи најголемото изненадување и победи со 3:1 во четврт-финалето. Тој турнир претставуваше прв настап на Белгија по ЕУРО 2000.
Сега, без сомнение Белгија го има еден од најдобрите состави на првенството и затоа оправдани се очекувањата во белгиската фудбалска јавност – титула.
Тимот на Мартинез во одлична форма
Белгија доаѓа на ЕУРО со девет натпревари без пораз во сите натпреварувања и со многу талентирани лица во своите редови, па на „црвените ѓаволи“ не им треба дополнителен поттик да слават на првиот натпревар против Русија. Годинава тимот на Мартинез славеше над Велс со 3:1 и против Белорусија со неверојатни 8:0, но одигра и 1:1 кај Чешка. Сите три меча бе аво рамки на квалификациите за пласман на Светското првенство. Во подготовките, Белгија одигра само 1:1 со Грција и славеше со 1:0 над Хрватска. Формата според селекторот е добра и тој најави дека најдоброто следува на ЕУРО 2020.
Можеби најмалку познати лица Белгија има во дефанзива, но според резултатите тоа не изгледа така на терен. За средината и нападот пак не треба да се трошат зборови. Средината со Де Брујн има милион опции, со Витсел има цврстина и сигурност, со Тилеманс и Прает хомогеност, а тука се Караско, Азар и уште неколкумина за тимот да има целина. Нападот предводен од неверојатниот Лукаку, Мертенс и младиот Доку има разновидност која ќе биде повеќе од потребна за да се дојде до толку посакуваниот трофеј.
Лесно во квалификациите, но …
Русија слично како и Белгија немаше проблем во квалификациите ( беа во иста група со Белгија ) и заврши втора со 24 бода. Изгуби смао шест бода и тоа при двата порази од Белгија. Полуфиналниот настап во 2008 година за Русија инспирирана од Андреј Аршавин е мотивација за денешната генерација која ќе игра пред своите навивачи. За разлика од тогаш, тие не успеаја да ја минат својата група во 1996, 2004 и 2012 година. Очекувањата овојпат не се баш сјајни во нивната земја.
Три години од пречекот на најдобрите светски селекции во Русија за СП 2018, избраниците на Черчесов имаат далеку од загарантиран пласман во нокаут фазата на ЕУРО. Покрај Белгија која е фаворит, тука е и одличната Данска, како и аутсајдерот Финска.
Одиграа слабо во Лигата на нации, но сега имаат две победи од нивните три воведни натпревари во квалификациите за Светското првенство, но против Словенија и Малта, а загубија од Словачка. Од секоја гледна точка, се чини дека овој шампионат за нив доаѓа во незгодно време, а единствената нивна предност ќе биде домашниот терен.
Русите не веруваат во својата репрезентација
Руските навивачи сега гледаат на нивната репрезентација како на еден куп просечни играчи. Загубија со 5:0 од Србија во нивниот последен натпревар од 2020 година. Ги спомнавме дуелите од квалификациите за СП, а во пријателските дуели пред овој шампионат одиграа реми со Полска и славеа минимално над Бугарија.
Дваесет и четиригодишниот Александар Головин е најдобриот играч на Русија, обезбедувајќи клучни додавања до напаѓачите и беспрекорно организирајќи ја играта. Фудбалерот на Монако воедно е еден од неколкуте во рускиот состав што игра на друго место на континентот и е влијателен во успехот на тимот. Тој заедно со Оздоев и Зобнин се одлично трио во средината и се играчи кои можат да им создадат проблеми на многу посилни репрезентации. Истото важи и за килата Черишев, Миранчук па и Фомин и без разлика на моментумот, Русија со овие фудбалери и домашниот терен, може да се надева на пласман во следната фаза.
Очекување
Јасно е кој е фаворит на овој меч. Се е на страната на Белгија, а единствената предност на Русија е домашниот терен. Но тој не беше доволен во квалификациите, кога Белгија на истиот овој стадион славеше со 1:4. Сега, само две години подоцна ништо не е променето во однос на тој меч. Белгија сака до златото и својата кандидатура сака да ја истакне веднаш со победа на стартот на шампионатот. Русите пак, својата шанса треба да ја бараат во дуелите со Финска и во можеби клучниот меч од оваа група, оној Русија – Данска.
2 Trackbacks / Pingbacks