Ливерпул е домаќин на Лестер во најинтересниот дуел од Премиер Лигата во недела. Лестер има бод предност и со одлични резултати патува во Ливерпул, кој сака да постави нов рекорд кога во прашање се домашните натпревари.
Клоп се соочува со проблеми со тимот, но не бара алиби, додека Роџерс е мирен но е свесен дека по гостинските победи над Сити, Арсенл и Лидс на последните три гостувања може до победа и против Ливерпул.
Клоп со сериозни проблеми
Тешко беше да се замисли дека меѓународната пауза можеше да помине многу полошо за Ливерпул, а сите веруваа дека ќе биде добредојдена за нив по низата повредени фудбалери. Најлошите стравувања на Клоп во врска со немилосрдниот распоред сега изгледаат благи.
Виргил ван Дајк веќе знаеме дека ќе отсуствува речиси до крајот на сезоната. Трент Александар-Арнолд се повреди против Манчестер Сити, а Фабињо и Тиаго Алкантара споро се враќаат по повредите. Во меѓувреме се повреди уште еден бек – Џо Гомес. Во репрезентациите се повредија и Хендерсон, Ендру Робертсон, а Мохамед Салах излезе позитивен на Ковид-19. Особено загрижува одбраната бидејќи покрај најдобрите, сега на мали повреди се жалат и Риси Вилијамс и Неко Вилијамс. Сепак Роберстон, Нико Вилијамс и Фабињо веројатно ќе стиснат заби и ќе играат, без разлика што во други околности со сигурност би паузирале.
Тоа е криза со повреди во големи размери со кои Клоп не се среќавал често во кариерата, но тој не беше расположен да се жали или да бара алиби за евентуален неуспех на прес-онференцијата пред овој меч со Лестер. Напротив ја истакна важноста играчите што ги има на располагање да го дадат својот максимум.
Уште еден меч без пораз и нов рекорд за Ливерпул
Фактот дека натпреварот е на „Енфилд“ е позитива што Клоп ќе се обиде да ја искористи – неговиот тим нема пораз на 63 натпревари во Премиер Лигата на домашен терен и му треба само уште еден меч за да постави нов рекорд откако го изедначи претходниот најдобар рекорд со победата над Вест Хем во последниот домашен натпревар.
Ваква серија екипата последен пат имаше меѓу февруари 1978 година и декември 1980 година. Интересно но тогаш таа серија на крајот ја заврши Лестер. Оваа екипа како да е талична за Ливерпул па „Лисиците“ се исто така еден од двата гостински клуба кои на последните 38 натпревари одзедоа бодови од Ливерпул на „Енфилд“.
Ливерпул постигна гол на секој од тие 38 натпревари, што воедно е уште еден рекорд на клубот. Од друга страна, Ливерпул на четирите домашни натпревари сезонава ниту еднаш не ја зачува својата мрежа.
Лестер со одличен старт
Лестер има одличен старт на сезоната, најдобар старт од сезоната 2015-16 година, кога на чудесен начин ја освоија титулата, па не е чудно што веќе започнаа прашањата поврзани со тоа дали може да го повторат тој успех.
Роџерс побрза да ги смири ваквите размислувања, но фактот што се појави темата на разговор е доказ за работата што тој ја врши на стадионот „Кинг Пауер“.
Навистина, Лестер ужива во најдобриот старт на сезоната со 18 поени од осум натпревари – дури и подобар од тој поход кон титулата и пристигнува на „Енфилд“ со серија од шест последователни победи во сите натпреварувања.
Бројот од шест победи на „лисиците“ од нивните осум натпревари во лигата е колку што успеаја во последните 22 натпревари од минатата сезона, а четири од тие триумфи се на гости.
Уште една победа во недела би поставила нов клупски рекорд од пет последователни победи на гостински терен, и тие ги имаат сите причини да бидат сигурни во себе дури и за сметка на домашниот рекорд на Ливерпул, совладувајќи ги Манчестер Сити, Арсенал и Лидс на последните три гостински натпревари.
Можна почетна постава на Ливерпул:
4-3-3 – Алисон; Нико Вилијамс, Фабињо, Матип, Робертсон; Џонс, Вијналдум, Кеита; Јота, Фирмино, Мане
Можна почетна постава на Лестер:
3-4-2-1 – Шмајхел; Фофана, Еванс, Фукс; Кастање, Менди, Тилеманс, Џастин; Медисон, Барнс; Варди
Be the first to comment