Во предпоследното коло од Групата Г во квалификациите за пласман на ЕУРО 2020, Македонија гостува кај Австрија. Поразот од Австрија со 1:4 во Скопје беше еден од најтешките за Македонија во последно време, но сега селекторот Ангеловски се соочува и со дополнителни проблеми. Македонија ќе биде видно ослабена со неиграњето на седум стандардни репрезентативци.
Македонија сака да го задржи третото место
Оние два пораз по ред во Скопје од Полска и Австрија се покажаа како клучни за Македонија во овие квалификации. Да останевме непоразени барем на еден дуел од нив, сега се ќе беше поинаку. Вака, има само теоретски шанси за пласман на ЕУРО 2020, но тие се нереални па ниту нашите репрезентативци не веруваат во нив. Сепак, селекторот Игор Ангеловски најави дека овие последни два меча ќе бидат добра подготовка за баражот против Косово. Освен тоа, Македонија има шанса како никогаш досега да биде на третото место во едни квалификации, а тоа ќе биде успех сам по себе за оваа репрезентација. И не е само тоа, со тој пласман Македонија ќе биде многу подобро рангирана и во следните квалификации ќе се најде во подобар шешир и ќе добие релативно полесни репрезентации. Значи и покрај се, овие последни два меча се доста важни за Македонија.
Македонија десеткувана и со видно изменет состав
Ангеловски се соочува со еден куп проблеми пред гостувањето во Австрија. Македонија како никогаш досега ќе биде десеткувана на овој меч. Нема да можеме да сметаме на дури седум фудбалери на Ернст Хапел стадионот во Виена. Најголем хендикеп ќе биде неиграњето на Адеми и Алиоски. Адеми е незаменлив во својата дефанзивна улога во средниот ред, а пак за Алиоски не треба да се трошат многу зборови. Кога игра тој се е поинаку, а без него и веќе сме заборавиле како би изгледале. Повреден е и Тричковски кој се наоѓа во одлична голгетерска форма, а ќе го нема и стандардниот во одбраната во последно време Бејтулаи.
Проблемите не застануваат тука бидејќи имаме и тројца суспендирани фудбалери. Неиграњето на Муслиу е голем хендикеп. Без Бејтулаи и Муслиу одбраната ќе загуби многу. Суспендиран е и Бобан Николов во средината, како и Несторовски во нападот.
И Пандев се соочува со проблем, откако се пожали на вирус но според лекарскиот тим тој ќе биде способен за настап во Австрија. Сепак, дури и да настапи тешко дека ќе може да даде 100% од своите можности.
Австрија по заверка на билетот за ЕУРО 2020
На Австрија и треба само бод од дуелот со Македонија за да обезбеди пласман на ЕУРО 2020. Тоа само по себе е огромен мотив и тие нема да остават ништо на случајноста и ќе нападнат од првата минута. Освен тоа тие имаат уште еден мотив.
Имено, на 15-ти ноември тие прославувија голем јубилеј: 125 години од првиот официјален фудбалски натпревар одигран во земјата.
Тие ја завршија својата работа досега на одличен начин и покрај тоа што стартуваа разочарувачки. Загубија дома од Полска, па потоа беа поразени во Израел со 4:2. Сепак по тие дуели Австрија одигра одлично и сосема заслужено е на второто место во групата. И не само тоа, туку тие беа доминантни во сите натпревари досега, па и во поразите што значи дека и на ЕУРО 2020 ќе патуваат со големи амбиции.
Македонија ќе игра против Лајпциг и Салзбург
Австрија игра типичен германски фудбал. Како да биде поинаку кога речиси целиот тим игра во Германија. Средниот ред на австријците им е неверојатен и тие можеби се најдобри во тоа поле во оваа квалификациска група. Лаимер и Сабитзер се неверојатен тандем кој се познава многу добро. Играа заедно во Салзбург, а сега се незаменливи во германски Лајпциг. Третиот играч во средината доаѓа од Салзбург и тоа Шлагер кој е еден од најголемите австриски таленти во моментов.
На крилата дејствуваат Лазаро од Интер кој имаше одличен меч и во победата на Австрија во Скопје. На другата страна е Алаба кој не играше во Скопје но сега ќе биде во првиот тим. Арнаутович е незаменлив во нападот. И одбраната е солидна. Драгович од Леверкузен и Хинтерегер од Ајнтрахт се последен бедем пред Линднер, додека на бековските позиции играат Лаинер и Улмер.
Be the first to comment