Челзи гостува на Бернабе кај Реал Мадрид на реваншот од четвртфиналето во Лигата на Шампиони во вторник навечер.
Бранителот на титулата патува во шпанската престолнина откако беше поразен со 1:3 во првиот натпревар на Стемфорд Бриџ. Бензема беше човекот на одлука на тој меч, а сега повторно погледите се насочени кон него.
Сите погледи свртени кон Бензема
Нема доволно суперлативи во речникот за да се опише формата на Карим Бензема, кој толку долго беше втора виолина зад Кристијано Роналдо на Бернабе, но сега ја дочека својата слава. Бензема е во центарот на вниманието и во Шпанија, но и на континентална сцена.
Како да не беше доволен еден хет-трик за исфрлање на Пари Сен Жермен од осминафиналето, Бензема стигна до уште еден хет-трик на Стемфорд Бриџ – постигнувајќи два рани голови со глава, пред да ги постави конечните 1:3 во вториот дел.
Тимот на Карло Анчелоти е цврсто со едната нога во полуфиналето на овогодинешното натпреварување. Комотната предност не би требало да биде проблем да се сочува кога тоа треба да го направи Анчелоти и тим како Реал Мадрид.
Викендов во Ла Лига се загреаа со победа од 2:0 над Гетафе – нивна осма победа на последните девет натпревари и се наговестува дека формата ќе продолжи и после овој реванш меч во Лигата на Шампиони.
Сепак, од друга страна Реал во оваа победничка серија се соочи со пораз во Ел Класико од Барса со 0:4 на домашен терен и тоа треба да биде предупредување пред овој важен дуел со Челзи.
Челзи пред речиси невозможна мисија
Одбраната на титулата за Челзи по таков катастрофален пораз во првиот натпревар, е речиси невозможна, но голот со глава на Каи Хаверц барем му даде на Челзи мала трошка надеж.
Имајќи очајна потреба од одговор на домашните порази од Реал Мадрид и Брентфорд, Тухел ја доби реакцијата на која се надеваше против Саутемптон на гостински терен викендов што измина. Челзи одигра неверојатен меч и славеше со дури 0:6 со головите на Мејсон Маунт (2), Тимо Вернер (2), Маркос Алонсо и Хаверц.
Тухел тешко дека би можел да посака подобро загревање пред патувањето на Бернабе, каде што ќе мора да го направат подвигот што ниту еден англиски тим досега го нема направено, ако сака да остане во натпреварувањето – победа на гости со најмалку два гола.
И покрај нивните неодамнешни порази на Стемфорд Бриџ, победата на Сент Мери ја претставуваше осмата победа по ред на Челзи на гостински терен во сите натпреварувања, а тие не успеаја да постигнат гол само на еден од нивните последни 15 натпревари во Лигата на шампионите во кои беа гостински тим. Имаат мали шанси за пресврт, но најавуваат борба до последната минута, а тоа е гаранција за добар фудбал во Мадрид.
Be the first to comment