Време е за долго очекуваното соседско дерби Бугарија – Македонија. Македонската фудбалска репрезентација гостува во Бугарија, на првиот меч од групата во Лигата на Нации, меч кој може да се покаже како клучен за крајниот пласман.
Долго очекуваниот дуел се игра во Разград, далеку од македонската граница, но Македонија според најавите ќе има подршка од трибините од околу 200 навивачи.
Самодовербата на максимално ниво
По двата бараж дуели за пласман на Светското првенство во Катар, Македонија го насочува вниманието кон новото издание во Лигата на Нации и кон овој прв меч со Бугарија на гости. Имаме поволна група во која покрај Бугарија уште се Грузија и Гибралтар, па од таму и надежите дека повторно преку ова натпреварување ќе можеме да стигнеме до Европско Првенство.
Победата над Италија одекна како бомба во фудбалскиот свет, па иако поразот од Португалија беше болен, Македонија не разочара – напротив, сега уште повеќе порасна довербата во селекцијата, а со тоа и амбициите.
Благоја Милевски не направи многу промени во однос на тие два меча, иако сега ќе бидеме видно ослабени поради неиграњето на неколку стандардни репрезентативци. Но Милевски не сака алиби и со доволно широк ростер на фудбалери патува во Бугарија.
Би требало Македонија да ја игра својата игра, со висок пресинг на стартот и со контрола на средината на теренот. Јасно е дека сме поквалитетни во средината од Бугарија и тоа би требало да се искористи во наша полза. Ако успееме да ја контролираме средината, а со тоа и темпото на игра, тогаш Македонија може до победа во Разград.
Македонија без Ристевски, Адеми, Ракип, Костадинов, Јаховиќ …
Видно ослабена ќе биде Македонија на овој меч. Ќе бидеме ослабени во сите линии, но највеќе во средината. Поради повреди отсутни ќе бидат Костадинов и Стефан Ристовски. Првиот имаше одлични мечеви за репрезентацијата и со своите игри се наметна во првиот тим, додека за Ристовски не треба да се трошат зборови. Ќе биде тешко без капитенот на десната бековска позиција и во двата правци – одбрана и напад.
Јаховиќ и Адеми добија одмор од страна на селекторот, додека Ердал Ракип побара да биде ослободен поради лични причини. Лавот Адеми ќе недостига и неговото отсуство ќе се почуствува на теренот, додека со неиграњето на Ракип се намалуваат можностите за ротација во средината. Се на се, јасно е дека против Богарија ќе истрчаме со 11 фудбалери кои за прв пат ќе настапат заедно на еден меч.
Бугарија сака фудбалски рестарт
Бугарија сака нов почеток на репрезентативниот фудбал и враќање на славните времиња од пред околу 20 и повеќе години. Последните десетина години Бугарија беше во целосен пад, но сега повторно има некои надежи за напредок, а мечот со Македонија за нив може д абиде патоказ.
Одиграа катастрофални квалификации за пласман на Светското првенство, откако освоија само осум бодови од исто толку натпревари и завршија на четвртото место во нивната квалификациска група зад Швајцарија, Италија и Северна Ирска. Единствено зад нив остана Литванија која освои само три бода и тоа токму од победата над Бугарија со 3:1 во Вилнус. Сега се со нов селектор, со некои нови помлади фудбалери, па од таму и амбициите и надежите дека можат многу подобро.
Лоша серија за Бугарија
Откако загубија со 4:0 од Швајцарија во нивниот последен натпревар во групата од квалификациите, бугарите претрпеа порази со идентични 2:1 на пријателските натпревари против Катар и Хрватска во Март.
Момците на Јасен Петров сега го насочуваат своето внимание кон четирите натпревари од Лигата на нации во Јуни, а селекторот смирува по двата порази во Март и најавува дека вистинската игра од Бугарија ќе се очекува токму на овие натпревари.
„Лавовите“, кои испаднаа од групата 4 во Лигата Б во 2020 година, откако не успеаја да победат на ниту еден од нивните шест натпревари во Лигата на Нации, ќе имаат серија од 10 натпревари без победа во натпреварувањето, ако не успеат да ги освојат трите бода во четврток.
Традицијата на страна на бугарите
Интересно е тоа што мечот во Разград на „Хувефарма арена“ е прв официјален натпревар меѓу Македонија и Бугарија, но во исто време е вкупно осми во досегашната историја.
Сите седум натпревари досега беа од пријателски карактер, а во нив Бугарија има подобар скор. Првиот меч во 1994 заврши без голови 0:0, за по две години Бугарија да слави дома со 3:0. Следеше првата победа на Македонија во 1998 со 1:0, па две победи на бугарите – прво во Софија со 1:0, па во Македонија со 0:1.
Во 2013 година Македонија победи со 2:0 на домашен терен, додека на последниот меѓусебен дуел во Скопје во 2016 година бевме поразени со 0:2.
Бугарија е поуспешна со четири победи, наспроти две на Македонија и една средба која заврши без победник, додека гол разликата е 7:3 во корист на Бугарите. Време е традицијата да се сврти во корист на Македонија.
Be the first to comment