Се уште барајќи ја својата прва победа на гости во оваа сезона, последниот тим на табелата Барнли ќе патува на стадионот Амекс за да се соочи со Брајтон во Премиер лигата во сабота.
Галебите пак, победија само на еден од последните осум натпревари на домашен терен и допрва треба да бараат максимални три бода пред своите навивачи во 2022 година.
Одлична сезона за Брајтон
Брајтон има добра сезона и во тоа нема никаква сомнеж. Но нивната статистика е навистина чудна. Серијата од седум натпревари без пораз во лигата заврши во вторникот вечерта, кога беа поразени со 2:0 на гостувањето кај Манчестер Јунајтед. Чудна статистика бидејќи од една страна Брајтон има само една домашна победа на последните осум меча, а во исто време има само еден пораз оној од Јунајтед на последните осум дуели без разлика дали се дома или на гости.
По првото полувреме без голови, Кристијано Роналдо постигна гол, пред Луис Данк да биде исклучен три минути подоцна. Бруно Фернандеш во 97-та минута ги постави конечните 2:0, нанесувајќи им го на гостите само петтиот првенствен пораз сезонава.
Момците на Греам Потер остануваат во првата половина на табелата од Премиер лигата, на деветтото место и со само четири бода зад Вулверхемптон кој е на седмото место, а кој моментално го зазема последното место кое води во Европа следната сезона.
Брајтон сака во Европа
Токму Лигата на Европа е амбицијата на Брајтон сезонава и покрај тоа што пред сезоната никој во тимот не размислуваше за Европа. Сепак, како одминуваа натпреварите, така растеа амбициите на сите во тимот и тоа сосема оправдано. Само Челзи, Ливерпул и Манчестер Сити имаат помалку порази од Брајтон сезонава кој игра неверојатно цврсто во дефанзива.
Нападот им е послабата страна, па оттука се оние 12 нерешени средби до сега. Доколку екипата успее да го подигне офанзивниот дел на едно повисоко ниво, тогаш немојте да се изненадите доколку ги гледате Брајтон во Европа следната сезона.
Брајтон воспостави репутација како специјалист за ремија оваа сезона, со повеќе од кој било друг тим во Англија. Овој меч сепак е нешто друго и реми за Брајтон нема да биде задоволувачки резултат. Играат против последниот тим на табелата и ако сакаат да ја остварат амбицијата мораат да слават на овој меч.
За нив саботниот дуел е да се биде или не и само со победа ќе докажат дека местото на табелата не е случајност.
Барнли заборави да победува
Барнли ја продолжи својата катастрофална серија без победа во Премиер лигата на 11 натпревари кога претрпе тесен пораз од 0:1 на домашен терен против Ливерпул минатиот викенд.
Еден удар одблиску на Фабињо пред полувремето беше доволен за победа на Ливерпул и 9-ти пораз за Барнли.
Тимот на Шон Дајч останува на дното на табелата, со само една сезонска победа од 21-от првенствен натпревар и има седум бода заостанување од безбедната зона. Ако има нешто позитивно во целата приказна е тоа што Барнли има по два или три натпревари помалку на трите тима што се наоѓаат над нив на табелата.
Може да се извлечат многу позитивни страни од двете ремија одиграни против Арсенал и Манчестер Јунајтед во последните недели, но со оглед на тоа што Њукасл, Евертон и Норвич почнаа д апобедуваат, момците на Дајч ќе мораат да почнат да победуваат ако сакаат опстанок.
Воедно, Барнли е еден од двата тима во првите четири лиги на англискиот фудбал без победа во лигата оваа сезона на гостински терен, заедно со тимот од Чемпионшип, Барнсли.
Be the first to comment