Бранителот на титулата Атлетико Мадрид ќе се обиде да ја подобри својата позиција на врвот на табелата во Примера во недела, кога ќе патува кај Кадиз кој секако е аутсајдер на овој меч.
Избраниците на Диего Симеоне претрпеа незгоден пораз од Милан во Лигата на шампионите во текот на неделата, па сега ќе сакаат веднаш да се вратат на победите, додека домаќините беа поразени од Хетафе на нивниот последен меч во неделата.
Кадиз излезе од опасната зона
Откако импресивно го избегнаа испаѓањето минатата сезона по нивната промоција, Кадиз имаше тежок почеток на новата сезона и тие постојано беа во зоната за испаѓање. До пред четири кола беа со само седум бода по првите 10 натпревари.
Екипата на Алваро Сервера во изминатите четири натпревари донекаде ја корегира својата форма, прекинувајќи ја губитничката серија со ремито 3:3 против шампионот во Лига Европа – Виљареал. Алваро Негредо потоа успеа да спаси бод со пенал во 93-та минута против Мајорка.
Потоа се случи клучна победа која дојде пред репрезентативната пауза. Беа целосно отпишани на гостувањето кај Атлетик Билбао, но славеа победа со 0:1 со голот на Салви Санчез уште во 5-та минута од дуелот.
Сепак, тие не можеа да го задржат ритамот, па 19-то пласираниот Хетафе им нанесе тежок пораз на избраниците на Сервера со 4:0 минатиот викенд.
Тоа ги остави Пиратите на 16-то место, но тие сега се надвор од зоната за испаѓање, иако со предност од само еден бод во однос на Елче.
Симеоне загрижен за ЛШ, а со мислите кон Ла Лига
Додека момците на Диего Симеоне загубија само еден натпревар во Ла Лига досега оваа сезона, тие не беа во можност да доминираат во лигата од самиот почеток како минатата сезона, па моментално се на четвртото место со 26 поени од нивните воведни 13 натпревари. Имаат само еден пораз, но затоа имаат дури пет нерешени средби, што и тоа како им ги намалува шампионските амбиции, амбициите за одбрана на трофејот.
По разочарувачкото реми 3:3 со Валенсија, паузата беше добредојдена па во минатото коло Атлетико славеше над Осасуна со 1:0. Но победата беше тешка, со гол на дефанзивецот Фелипе во 87-та минута.
После тоа следеше разочарувачки пораз од 0:1 од Милан во групната фаза од Лигата на шампионите во средата. Овој пат тие беа екипата која прими гол во 87-та минута. Сега во ЛШ се на последното место со само четири бода, исто колку што има и Милан, а еден помалку од Порто.
Атлетико сонува за две врзани победи
Сега момците на Симеоне сега целосно ќе го свртат своето внимание кон домашниот шампионат, бидејќи сакаат да забележат две последователни победи во Ла Лига за прв пат од месец Август. Да, добро е напишано – Атлетико нема две победи по ред во Ла Лига од Август.
Со оглед на тоа што градскиот ривал Реал Мадрид сега има четири бода повеќе од тимот на Симеоне на врвот на табелата, Атлетико знае дека има малку простор за грешка доколку сака да остане во силна позиција во одбраната на шампионската титула.
Амбициите на Симеоне се високи, на раководството исто така па секој кикс во продолжение на сезоната ќе биде голем удар за нив. Атлетико има одличен тим и веројатно се работи за кризен период, а екипата на Кадиз е одлична можност тимот да фати победнички залет и да се искачува кон врвот на табелата.
Be the first to comment