ПСЖ мора да слави победа на овој меч, ако сака да остане со шансите за пласман во нокаут фазата. И со реми или пораз ништо нема да биде готово, но тогаш ќе имаат исклучително тешка задача, а ќе зависат и од останатите натпревари.
Домаќините успеаја само еднаш да победат во трите досегашни европски натпревари, додека Лајпциг триумфираше двапати за да има три бода предност во однос на ПСЖ.
ПСЖ ќе нема алиби за евентуален неуспех
Средбата на ПСЖ со Монако во петокот беше најавена како дерби на колото и во целост ги оправда очекувањата, но резултатот не беше во корист на тимот на Томас Тухел.
Свеж по повредите, на Килијан Мбапе не му требаше премногу време за да се врати во натпреварувачка форма, па веќе во првото полувреме постигна два гола за комотно водство на неговата екипа од 0:2. Сепак, ПСЖ беше непрепознатлив во второто полувреме – прими три гола за целосен пресврт и пораз од 3:2.
Тухел не се воздржа по натпреварот – го опиша второто полувреме како „катастрофално“, иако „парижаните“ беа една од најпогодените екипи во Франција со повреди како и со играчи кои настапуваа за своите репрезентации.
Сепак, приврзаниците на ПСЖ сигурно нема да прифатат никакви изговори за овој меч со Лајпциг, бидејќи шампионите во Лига 1 се надеваат дека ќе го задржат притисокот врз првите две екипи во групата Х, а финалистите од минатата година се пред императив да победат.
Со рецептот од првиот меч по бодови во Париз
Во меѓувреме, Лајпциг исто така бара да ги исправи грешките од мечот со Ајнтрахт Франкфурт минатиот викенд во Германија. Беа фаворити, но освоија само еден бод од гостувањето играјќи 1:1.
Лајпциг губеше по првиот дел и покрај подобрата игра, но Јусуф Поулсен кој влезе на полувремето постигна гол во вториот дел за конечни 1:1.
Тоа секако не беше идеална подготовка за патувањето кај повеќегодишниот шампион на Франција, но Нагелсман е мирен поради фактот што неговиот тим има три бода повеќе од своите противници.
Доколку Лајпциг остане непоразен кај ПСЖ, ќе завршат голем дел од задачата и ќе бидат со едната нога во следната фаза, бидејќи до крајот играат на гости со башакшехир и дома со Манчестер Јунајтед во последното коло.
Тимот на Нагелсман веќе го победи ПСЖ во Германија, со головите на Кристофер Нкунку и Емил Форсберг, откако Анхел ди Марија му донесе предност на гостинскиот тим кој до крајот остана без Идриса Гуеје и Пресел Кимпембе кои добија црвени картони. Нагелсман се надева дека со ист рецепт ќе освои најмалку бод во Париз.
Можна почетна постава на ПСЖ:
4-3-3 – Навас; Флоренци, Диало, Маркињос, Бакер; Переира, Паредес, Рафиња; Ди Марија, Мбапе, Нејмар
Можна почетна постава на Лајпциг:
3-4-2-1 – Гулаци; Орбан, Упамекано, Конате; Хенрихс, Хаидара, Нкунку, Анџелино; Сабицер, Форсберг; Поулсен
Be the first to comment