Ерменија на неутрален терен на Кипар ќе ја пречека Македонија во последниот дуел од групата во Лигата на Нации. Македонија е прва со бод повеќе од ерменците и ни е доволен и еден бод за наредното издание да играме во сегментот Ц, со што би биле и многу поблиску до наредното ЕП во 2024 година.
Не е сеедно на кое место ќе завршиме, но доволно ни е и реми
Мечот со Грузија веќе е зад нас, како и оној со Естонија и тие две победи треба да се заборават пред овој меч со Ерменија кој е од голема важност. Не е седно на кое место ќе завршиме во групата и македонските репрезентативци треба да дадат се од себе, барем да останат непоразени и да го зачуваат лидерското место. Дуелот директно одлучува дали третото идание од Лигата на нации кое стартува на 2-ри јуни 2022 година, Македонија ќе го дочека во ранг погоре (Б дивизија) или ќе останеме во Ц. Тоа издание на Лигата на нации ќе носи на ЕП во 2024 година. Тоа што е добро, е доколку одиме во Б сегментот, без разлика на кое место ќе завршиме во групата секако ќе играме ПЛЕЈ-ОФ за ЕП. Тоа е така бидејќи од тој сегмент има многу голем број на репрезентации што преку квалификациите секако обезбедуваат пласман на ЕП и затоа се отвара можност за екипите кои нема да успеат од квалификациите, а не биле први во своите групи. Тоа секако е дополнителна шанса за нас, која мораме да ја искористиме, но за тоа потребно е да не загубиме од Ерменија.
Целосно нова средина
Ќе гледаме некоја нова Македонија на Кипар против Ерменија. Премногу измени имаше во нашиот состав и од таа гледна точка тешко е да се предвиди како ќе изгледа Македонија на терен. Речиси половина тим ќе го нема, половина стандардни првотимци, а тоа особено важи за средината која е целосно нова без Барди, Елмас, Адеми, Николов и Спировски. Ќе го нема ниту Алиоски на левата бековска позиција, ниту Пандев. Но ова ќе биде добра можност за новоповиканите фудбалери, или оние кои имаат мала минутажа да се докажат. За некои од нив, ова може да биде и единствена можност пред Европското Првенство, па тоа може да биде дополнителен мотив за да дадат и повеќе од своите можности. Особено, ќе биде интересно како ќе делува средината во која многу веројатно ќе се најдат Костадинов, Мицевски и Тотре.
Ерменија не надигра во Скопје, но загуби
Ерменија на првиот меч во Скопје не надигра. Тој меч веројатно беше најслабиот за Македонија во оваа група, но повторно победивме. Славевме со 2:1, но двата гола ги дадовме од пенал. Од пенал постигна гол и Ерменија, но тие имаа многу шанси на тој меч. Упатија 16 удари кон нашиот гол, за разлика од Македонија која имаше девет удари. И поседот на топката беше на нивна страна, а и подобрите шанси. Имавме среќа и на крај славевме, но сега ќе ни треба далеку подобар меч од тој во Скопје. Ерменија од тогаш нема пораз и забележа победа над Естонија, па две ремија со Грузија и Естонија и пред неколку дена победа над Грузија со 1:2 во Тбилиси. Грузијците можеби беа истрошени од мечот против Македонија во финалето, но секако таа победа на Ерменија треба да биде предупредување за нас. Единствено добро е тоа што најдобриот во Ерменија, Михтаријан нема да игра на овој меч, но тој не играше ни во Скопје, а Ерменија одигра многу добро.
Треба особено да внимаваме на напаѓачите, Адамјан кој сезонава на шест меча за Хофенхајм постигна четири гола, како и на напаѓачите од Руската суперлига – Карапетиан и Коријан.
Македонија од фаворит стана аутсајдер според букмејкерите
Букмејкерите целосно се предомислија за овој меч. Македонија важеше за фаворит, но по огромните промени во составот коефициентот за победа на Македонија од 2.30, се зголеми на 3.00. За победа на Ерменија пак коефициентот е околу 2.35. Може да очекуваме и голови на овој меч, ако се погледне традицијата. Македонија и Ерменија до сега одиграле неверојатни девет натпревари, а само на еден меѓусебен меч не паднале повеќе од три гола. Македонија има четири победи, Ерменија славела на три меча, а два натпревари завршиле нерешено.
Можна почетна постава на Ерменија:
4-4-2 – Јурченко; Хофханисјан, Калисир, каројан, Хамбурџијан; Газаријан, Григоријан, Бичхасијан, Барсегијан; Адамјан, Карапетиан
Можна почетна постава на Македонија:
4-3-2-1 – Шишковски; Бејтулаи, Велковски, Муслиу, Ристовски; Костадинов, Мицевски, Тотре; Трајковски, Тричковски; Несторовски
Be the first to comment