Тотенхем – Евертон: Двете екипи ја сонуваат Европа, а победникот ќе биде блиску до остварување на сонот

јули 6, 2020 Jovica Анализа на натпревари

Тотенхем е домаќин на Евертон во последниот натпревар од 33-то коло во англиската Премиер Лига. Ќе биде ова интересен меч во кој евентуалниот победник ќе биде многу блиску до излез во Европа, а тоа е целта и на двете екипи.

Тотенхем очаен, сега се лутат на ВАР

Менаџерот на Тотенхем, Жозе Мурињо беше разбирливо вознемирен, незадоволен и лут откако на Спарс им беше поништен гол по одлука на ВАР во четвртокот во поразот од 3:1 од Шефилд Јунајтед. Хари Кејн мислеше дека израмни за голема радост на гостите, но само неколку моменти подоцна неговиот гол беше контроверзно отфрлен од ВАР, бидејќи Лукас Моура играл со рака.

Спарси се мачеа да го најдат својот ритам по таа одлука. Шефилд си продолжи во исто темпо и со уште два гола во вториот дел ја запечати судбината на Тотенхем, пред Кејн да дофати доцна утеха со својот гол. Во интервјуто после натпреварот Мурињо, чија екипа сега е девет бода подалеку од четвртото место и седум бода подалеку од шестото, рече дека неговите фудбалери треба да бидат ментално посилни за да се справат со одлуките што е тешко да се постигне во оваа фаза од сезоната.

Тотенхем, кој нема завршено надвор од топ-шест во лигата дури од 2009 година, очигледно има катастрофална сезона и од оваа гледна точка не може да се каже дека одлуката да се донесе Мурињо беше добра. Избраниците на Мурињо беа летаргични и се мачеа да го пронајдат својот ритам цела сезона. Тотенхем победи на само еден од последните шест натпревари во Премиер лигата, а има само една победа на последните девет средби во сите натпреварувања.

Евертон сонува за Лигата на Европа

Евертон го задржа притисокот по рестартирањето на сезоната за место во Европа со импресивната победа над Лестер на Гудисон Парк во средата вечерта со 2:1. Фудбалерите на Евертон се без пораз откако продолжи Премиер лигата, со втора последователна победа која доаѓа над силен тим и тоа со брзи два гола на почетокот од средбата.

Евертон беше очаен на стартот од сезоната, но откако Анчелоти го презема тимот, тие се импресивни. Сега тие се во позиција која би можела да биде доволно добра за да се обезбеди пласман во квалификациите за Лигата на Европа. Имаат еден бод помалу од Тотенхем, но со игри како до сега, Евертон може многу да напредува, а овој е еден од клучните натпревари за нив. Ако го престигнат Тотенхем, ќе имаат значително полесна задача до крајот на сезоната.

Ричарлисон беше заменет во средата рано во второто полувреме, но Анчелоти ги ублажи стравувањата по натпреварот со тоа што изјави дека Бразилецот ќе биде погоден за натпреварот во понеделник. Италијанецот додаде: „Тимот покажува добар дух и мотивација. Сонот за Лига Европа е многу важен за нас и од оваа причина ние ќе се бориме до крајот“.