Во третото коло од Светското Првенство во Германија и Данска не очекува дерби натпреварот против Хрватска. Репрезентација која ја предводи поранешниот македонски селектор, Лино Червар а која досега собра две победи и тоа против Исланд и Јапонија.
Талевски и Кузмановски мора да дадат многу повеќе
Кире Лазаров се уште е најсилната алка на тимот и повторно тој ја преземе најголемата одговорност кога станува збор за офанзивата. Сепак, тоа е веќе прочитано кај нашите противници и јасно е дека Раул мора да смени нешто во играта. Тенка е клупата на Македонија, но оние млади момци кои добија шанса против Бахреин докажаа дека можеме да имаме светла иднина ако се работи правилно со нив. Кузмановски и Талевски сепак разочараа, барем досега. Талевски имаше многу промашувања и непрецизни удари против Бахреин. Кузмановски пак имаше неколку голови, но пак правеше нереални пробивања во нападот и грешки кои можат скапо да не чинат против една селекција како Хрватска. Сепак, добро е тоа што најдобрите ракометари одморија и одиграа само околу 45 минути против Бахреин, па може да се каже дека донекаде свежи ќе го започнеме овој меч.
Одредени ракометари се дополнително мотивирани
Мотиви ќе има многу и на едната и на другата страна, Червар секогаш ќе го почитуваме, но неговите провокации кон одредени наши ракометари може ,,скапо’’ да ги наплати. Велеше дека Борко Ристовски е емотивно испразнет, не веруваше целосно во квалитетите на Талески, говореше дека Филип Кузмановски неправилно шутира… Е сега токму тие ракометари треба со далеку поголеми мотиви да го докажат спротивното.
Хрватска има големи амбиции и посакува медал
,,Коцкастите’’ се гигант во светскиот ракомет. Секогаш редовни на големите натпреварувања, најчесто и во борба за медалите, сепак им фали завршен чекор. На Мундијалите веќе имаат осетено како е да се биде прв. Предводени токму од Лино на Светското првенство во Германија станаа златни. Имаат и две најсјајни Олимписки одличја, сепак ,,црна’’ дамка претставува тоа што никогаш не се закитиле со Европскиот трон.
Мораме да бидеме свесни дека Хрватската ракометна федерација, Червар го донесе за одново црвено-белите да ги однесе на врвот. Не ги исполнија очекувањата на минатото Европско како домаќини, па сега Червар и неговите избраници се пред голем императив, евентуален нов неуспех полека ќе ја брише тезата за една моќна и силна селекција.
Раул ќе мора да го сопре моторот Циндрич
Раул ќе мора да скрои тактика за да го запре човекот кој му донесе финале во ЛШ со Вардар, Лука Циндрич. Околу средниот бек ќе се базира играта на Хрватите во нападот. Велко Марковски е премногу спор за да може да го запре Лука, па претпоставуваме дека ,,Ел Команданте’’ ќе проба да игра во одбрана со 5-1 зона. Дополнителен аргумент за тоа може да биде и што Хрватска повеќе не е моќна на линијата од шест метри како во минатото кога Вори царуваше во нивниот напад. Покрај Циндрич секако голема опасност кон нашиот гол ќе доаѓа и од нивниот капитен Дувњак, а на десната бековска позиција неприкосновен е Лука Степанчиќ.
Наш предлог:
Be the first to comment