Младинската фудбалска репрезентација на Македонија за фудбалери до 21 година е домаќин на Казакстан во рамки на квалификациите за пласман на ЕП во Словенија и Унгарија. Македонија е фаворит, но Казакстан е селекција која не смее да се потцени.
Македонија со две стартни победи на лидерската позиција
Македонските надежи после убедливиот старт и победата со 7:1 против Фарските острови, славеа и на гости против Црна Гора со 1:2. Само два меча одиграа македонските младинци, но се наоѓаат на лидерската позиција со шест бода, колку што има и главниот фаворит во групата Шпанија. Но гол разликата на Македонија е 9:2. На ред е Казакстан кој мора да се победи. Со победа на овој меч фудбалерите на Милевски на некој начин ќе ги отпишат казакстанците, итко како што ја отпишаа Црна Гора, па ќе остане до крајот Израел да ни биде најголем конкурент. Тоа е и целта во моментов, а таа е и тоа како остварлива по убедливите две победи на стартот.
Милевски повторно има генерација што ветува
Враќањето на Благоја Милевски на кормилото на младинската фудбалска репрезентација, го врати и сјајот во тимот. Тој имаше мала авантура во Израел, во екипата на Ашход, но по минатиот слаб квалификациски циклус, експресно се врати во селекцијата. А сите добро знаеме за каков човек и стратег станува збор. Тој го направи невозможното – возможно, со пласманот на Македонија на минатото Европско младинско првенство, а сега ја има истата цел. Има и генерација за почит, предводена од Митревски од Спортинг Лисабон, Чурлинов од Келн, Атанасов, Ристовски, Руфати … Сите до еден големи надежи на македонскиот фудбал, кој со генерацијата до 19 години беа многу блиску до Европско првенство.
Најголемата сила на Казакстан е цврстината
Казакстан е селекција составена исклучиво од фудбалери кои играат во домашниот шампионат. Имаат само еден фудбалер кои игра во странство, Бактијаров од Сочи но и тој не е стандарден во својот тим. Повеќето фудбалери доаѓаат од Каират, Алмати и Актобе, но само неколкумина се стандардни првотимци во своите екипи. Играта на Казакстан се базира на цврстина, што е обратно од онаа игра на Македонија која пак е технички добро поткована. За разлика од Македонија, Казакстан досега одигра четири натпревари и има по две победи и порази. Славеа во воведните две кола над Фарски Острови и Црна Гора, што значи дека оваа селекција никако не смее да се потцени. Но загубија од Шпанија и Израел. Оној пораз против Шпанија од 0:1 на домашен терен, е само уште една потврда дека станува збор за исклучително цврста репрезентација.
Be the first to comment