СП во кошарка – Група Б: Аргентина фаворит, Нигерија може да биде изненадување на шампионатот

Нигерија

Најнаселениот град во централна Кина, Вухан ќе биде домаќин на натпреварите од групата Б на Светското првенство во кошарка. Две селекции се истакнуваат пред другите во оваа група а тоа се Аргентина и Русија, но Нигерија и Јужна Кореа често во минатото знаеле да совладаат и поголеми фаворити.

АРГЕНТИНА – Тим со голема традиција и прв фаворит во групата

Аргентинците се подготвени да бидат не само најдобриот тим во својата група, дури и можеби најдобриот тим од групите А и Б што ќе влезе во четвртфиналето. Најпознатото име на списокот на тренерот Серхио Ернандез ќе биде поранешниот играч на Хјустон, Луис Скола, кој има 39 години и е меѓу најстарите играчи на Светскиот куп. Со Факундо Кампазо од Реал Мадрид кој треба да биде главен играч на Аргентина, тие двајца формираат страшен тандем. Впрочем, Факундо Кампазо на крајот на краиштата, не беше прогласен за МВП во финалето на шпанската лига без причина.

Ова е тим со богата традиција, со спој на младост и искуство и со големи мотиви. Тим кој откако го освои првиот Светски куп во 1950 година и заврши на второто место во 2012 година секогаш цели кон големи успеси. Оваа селекција доаѓа во одлична форма откако ги освои и Пан-Амските игри во 2019 година.

РУСИЈА – Без Швед ова е сосема различна селекција

Голем удар доживеа “Зборнаја” пред неколку денови кога дозна дека нивниот најдобар играч Алексеј Швед ќе го пропушти овој мундијал. Русија е рангирана на 10-то место на Светската ранг-листа на ФИБА, но без Швед ова е сосема друга селекција. И покрај тоа што беа извлечени во група со Аргентина, Русите сепак се надеваат во пласман дури и во четвртфиналето, благодарение на слабоста на останатите екипи во групата А. Но тука не е само Аргентина, туку и Нигерија која може да изненади. Крилниот напаѓач Сергеј Карасев од Зенит Санкт Петербург, најверојатно ќе биде нивниот главен играч заедно со Семен Антонов од ЦСКА Москва.

НИГЕРИЈА – Селекција со неверојатен талент и голем потенцијал да биде изненадување на првенството

Реално, Нигерија има тим за да ги изненади и Русија и Аргентина, но во оваа селекција има еден куп некошаркарски проблеми за да се очекува висок пласман. Нивното педигре во НБА е одлично, но нивното неискуство на големи натпреварувања и нивните проблеми можат да го прикријат нивниот талент. Тие дури имаа проблем да најдат финансии за да стигнат во Кина, но сепак на крајот се заврши добро за нив.

Играчот на Портланд, Ал-Фарук Амину ќе биде лидер на тимот, а тој треба да биде подржан од играчот на Сан Антонио, Чимези Мету и Окоги од Минесота. Конкретно, 21-годишниот Окоги, е како створен да биде ѕвезда со своите предиспозиции. Тој всушност играше за САД на Светскиот куп на ФИБА за играчи до 19 години во 2017 година, пред да одлучи да игра за својата матична земја. Тренерот Кевин Бурлесон има толку длабок ростер на располагање со кои може да стигне далеку, но големото прашање е дали може да имаат доволно фокус да го искористат целиот тој потенцијал. Ако проблемите наместо да ги дефокусираат ги мотивираат, оваа селекција може да биде и најголемо изненадување во Кина.

ЈУЖНА КОРЕЈА – Аутсајдер

Корејците очекувано беа едни од најимпресивните екипи на азиските квалификации, но тоа не им помогна на ждрепката за Светскиот куп. Сега Јужна Кореја ќе се соочи со неверојатни шанси против исклучително силни селекции. Можеби во Азија имаат рекорден број на освоени медали (27),но на Светско ниво немаат резултат. Ова е тим предводен од некои од најголемите ветерани во земјата, заедно со таленти во подем, но тоа е премалку за да очекуваат пласман во втората фаза. Корејците по се изгледа ќе треба да се задоволат само со настап на Светоското Првенство.

ПРЕДВИДУВАЊЕ:

1.АРГЕНТИНА

2.НИГЕРИЈА

3.РУСИЈА

4.ЈУЖНА КОРЕЈА

Be the first to comment

Leave a Reply

Your email address will not be published.


*