Македонија – Албанија: анализа и најава, да се искористи позитивната атмосфера

По освоените бодови во Израел, Македонија ќе настојува и во Струмица да освои три бода и да ја победи Албанија во натпреварот од 8-то коло во квалификациите за пласман на Светското Првенство во Русија. Сепак иако играме на домашен терен и во мечот влегуваме по победата од Израел, на натпреварот против Албанија ќе треба да прикажеме многу подобра игра доколку сакаме победа.

Младите наметнуваат победнички менталитет

Селекторот Ангеловски кој досега се жалеше за тоа дека го нема најдобриот состав, бидејќи дел од фудбалерите беа во младата селекција на Македонија која играше на Европското Првенство во Полска, овој пат е на слатки маки бидејќи на секоја позиција на теренот има по неколку опции. Веднаш по смената на генерациите и настапот на младите херои, се виде дека составот е видно освежен. Освен тоа оние староседелци во репрезентацијата играат одлично во своите клубови, а фудбалерите од домашниот шампионат конечно имаат силни натпревари ( пред се фудбалерите на Вардар кои ќе играат во групната фаза на Лигата на Европа ). Се надзира одлична можност за Македонија конечно да врзе две победи во едни квалификации бидејќи коцките се наместени во наша полза, во репрезентацијата владее одлична атмосфера, а ако досега се размислуваше за позитивен резултат под кој се подразбираше да не се загуби, сега во мислите на фудбалерите, па и во мислите на македонската спортска јавност се размислува само на победи.

Ангеловски конечно го пронајде рецептот за успех

Македонија одигра вкупно 7 натпревари во овие квалификации и селекторот Игор Ангеловски конечно се чини дека ја најде формулата за успех и вистинската формација на репрезентацијата. Против Израел, Ангеловски се реши за малку подефанзивна формација и не згреши. Сепак точно знаевме кога да одиграме пресинг на противничката половина, кога да се повлечеме пред својот гол и кога да изведеме контра напад. На терен истрчавме со поставеност 3-4-1-2, но во текот на натпреварот одлично се трансформиравме според ситуацијата на теренот. Така на пример кога Израел имаше иницијатива се поставувавме во формација 5-3-1-1, со тоа што Алиоски и Ристовски се враќаа пред својот шеснаесеттик, Барди се враќаше во линија со Спироски, а Пандев беше веднаш зад Несторовски. Кога ние имавме иницијатива Алиоски играше со отворен гард како лево крило, со тоа што бекот Кире Ристевски делуваше како лев бек, а во тие ситуации офанзивен беше и Ристовски. Иако имаше скептичност кога во прашање беше последната линија во одбраната, Велкосвки и Муслиу одиграа како зад себе да имаат еден куп мечево во националниот дрес, додека Кире Ристевски одигра стандардно добро. Нивната позиционираност беше беспрекорна и во текот на целиот меч забележавме само две грешки и тоа без поголема опасност за нашиот гол. Алиоски и Ристовски се изнатрчаа, додека напаѓачите притискаа токму во моментите кога тоа беше потребно. Единствено што фалаше беше повеќе воигрувања на средината на теренот каде што имаше мал број на пасови. Македонија забележа само 284 додавања, наспроти 619-те на Израел и тука мора да се работи уште, иако имавме добра прецизност па од тие 284 додавања успешни беа 219.

Формација 3-4-1-2: Димитриоски; Муслиу, Велковски, Ристевски; Алиоски, Николов, Спироски, Ристовски; Барди; Пандев, Несторовски

Македонија без Елиф Елмаз

Македонија нема да биде комплетна за пресметката со нашите соседи, бидејки творецот на победата, асистентот кој му подари одлична топка на Горан Пандев, Елиф Елмаз нема да биде во составот за мечот во вторник. Елмаз против Израел заработи жолт картон, што беше негов втор жолт картон во квалификациите по оној на мечот против Шпанија, што по автоматизам значи дека го пропушта следниот квалификациски меч, односно натпреварот против Албанија. Тоа значително ќе ги намали можностите за Ангеловски, кои со внесувањето во игра на овој фудбалер против Израел во второто полувреме успеа да го смени текот на мечот. Освен тоа, со мала повреда од Израел допатува и капитенот Горан Пандев кој се здоби со удар во десната нога, но Пандев ќе биде комплетно подготвен за пресметката во својата родна Струмица.

Албанија со Де Бјаси среќно славеше во Скадар, сега со Панучи во Струмица ќе им треба многу повеќе од среќа

Новиот селектор на албанската репрезентација и поранешен репрезентативец на Италија, Кристијано Панучи стартуваше со победа на своето деби, но победата беше очекувана бидејќи за ривал албанците го имаа Лихтенштајн. Панучи не промени скоро ништо во националниот тим, ги избра речиси истите фудбалери кои играа и досега и имаше офанзивна формација против Лихтенштајн но тоа беше очекувано ако се знае квалитетот на противникот. Албанија славеше со 2:0 но потешко од очекувањата бидејќи отпорот го скрши дури во вториот дел, поточно во 54-та минута преку Роши, додека вториот гол беше дело на Аголи во 78-та минута. Тешко е од овој меч да се извлече некоја поука или заклучок колку новиот селектор ќе донесе подобри ветришта во оваа селекција, но дуелот со Македонија ќе биде најголем испит за тоа.

Панучи најавува освојување и на трите бода во Струмица, но тој можеби не го гледал првиот меч помеѓу двете репрезентации во Скадар. Тогаш Македонија имаше одлична игра, по негативата Алиоски постигна деби гол во националниот дрес за израмнување и кога почнавме да притискаме и бевме многу блиску до целосен пресврт се случи невреме во Скадар и мечот беше прекинат. Продолжи следниот ден, а Македонија прими несреќен гол и загуби со 2:1. Тогаш Албанија имаше среќа, но овој пат во Струмица ќе биде друга приказна и оваа селекција не може да се надева повторно на среќата, па доколку дуелот има барем сличен тек како тој во Скадар тешко дека Албанија ќе дојде дури и до еден бод.

Формација 4-3-3: Бериша; Аголи, Ајети, Маврај, Хусај; Мемушај, Баша, Абраши; Роши, Садику, Хука

Каква е математиката до крајот на квалификациите

Македонија моментално се наоѓа на 5-то претпоследно место на табелата со само 6 освоени бода, односно со 5 порази и две победи, но гол разликата и не е така лоша. Шпанија и Италија се сигурни на првите две позиции, па затоа ќе се позанимаваме со Албанија и Израел. Албанија е трета со 12 бода или 6 повеќе од Македонија, додека Израел е на 4-та позиција со 9 бода, односно три повеќе од нас. До крајот на квалификациите ние имаме најлесен распоред, играме со Албанија дома, со Италија на гости и на крај со Лихтенштајн дома. За разлика од Македонија која игра само против Италија, Албанија и Израел играат и против Шпанија и против Италија. Албанците играат со Македонија, Шпанија и со Италија, а Израелците со Италија, Лихтенштајн и Шпанија, па доколку не се случи чудо нашите ривали би требало да доживеат порази од двата големи фаворити. Тука ние ќе го вметнеме и евентуалниот пораз на Македонија на гостувањето во Италија.

Доколку се случи тоа, ќе постои само еден услов Македонија да заврши на третото место што би било најголем успех во нашата историја. Сепак условот е крајно тежок, бидејќи мораме да ја победиме Албанија со минимум два гола разлика. Во таков случај, доколку се наредат коцките како што ние предвидуваме, сите три репрезентации би завршиле со по 12 бода и ќе мора да се направи мини-табела и ќе мора да се види гол-разликата во меѓусебните мечеви.

Кој фудбалер ќе постигне гол ?

Букмејкерите им даваат подеднакви шанси и на двете репрезентации, а кога во прашање се головите тука предничат Пандев и Садику за кои коефициентот дека ќе постигнат гол на овој меч е 6.50 во бет365. Втор фаворит за постигнување гол во Македонија е Несторовски со коефициент 8.50, исто колку што има и Лулаку на спротивната страна. Според букмејкерите следат четворица македонски фудбалери. Трајковски и Тричковски се со коефициент 9.50, додека Алиоски и Радевски со коефициент 11.00, исто колку што има и албанецот Грезда. Сепак со оглед на ривалитетот на двата противника, можеме да очекуваме жестоки дуели помеѓу фудбалерите и доста прекршоци, а кога се тие во прашање тука е одличниот Енис Барди кој веќе постигна четири гола за својот нов тим Леванте од слободни удари. Коефициентот за тоа дека Барди ќе постигне гол во бет365 е одличен и е 15.00, па според нас вреди да се ризикува.