СП во кошарка – Група Е: САД неприкосновен, Турција и Јапонија по второто место

Во Шангај се играат натпреварите од групата Е на Светското првенство во кошарка. Во оваа група се наоѓа главниот фаворит за трофејот САД. Но во оваа група има уште две селекции кои веруваат во пласман во следната рунда Турција и Јапонија, како и аутсајдерот Чешка.

САД – Фаворит број еден на првенството

Нема што премногу да се пишува околу САД, кој секогаш е главен фаворит за титулата без разлика со каков состав доаѓа на шампионатот. На ова светско првенство тие доаѓаат во прилично ослабен тим без многу ѕвезди кои ги имаат на располагање бидејќи преголем е бројот на играчи кои што го откажаа настапот. Во нивно отсуство, главни играчи ќе бидат Вокер, Тејтум, Митчел и Тарнер. Тие не се на рамниште на Харден, Дурант и останатите, но се доволно квалитетни да го освојат златото. Сепак, САД беше поразен од Австралија пред неколку дена што беше прифатено како катастрофа во САД. Тој беше прв пораз за САД по долги години, но можеби дојде во вистинско време, да ги разбуди кошаркарите и да ги потсети дека кошарка се игра на цела планета. Во секој случај, САД треба да се прошета во оваа група, да се загрее за тоа што ги чека во елиминациските натпревари.

ЈАПОНИЈА – Генерација како никогаш досега спремна да изненади

Јапонија има шанси како никогаш досега. Има генерација полна со квалитет која може да изненади. Дуото Руи Хачимура од Вашингтон и Јута Ватанабе, заедно со Ник Фазекас е неверојатно и може да се носи со сите во групата, секако со исклучок на САД.  Јапонија никогаш не го користеше ова трио за време на азиските квалификации, а беше одлична. Сега, не се сомневам дека тие ќе бидат уште поефикасни на Светскиот куп.  Загубија од Тунис и Аргентина, но победија над Германија и Нов Зеланд, па може да се каже дека изгледаат подготвено за голема борба на шампионатот.

ТУРЦИЈА – Тим кој може да се носи со сите и да стигне далеку

Второпласираните од Светското првенство во 2010 година искрено се надеваат дека ќе го повторат тој успех. Имаат супер тим, веројатно на исто рамниште како тој тогаш, но во подготовките не изгледаа баш така. Имаа само два порази, но токму од селекциите кои имаат исти амбиции како нив: Грција и Србија. Забележаа победи над Италија, Порто Рико, Јордан, Сенегал, Тунис и Франција, иако ниту една од нив не беше многу убедлива.

Имаат НБА играчи кои имаат квалитет да ја носат Турција низ ова првенство, Ќе ги предводи охриѓањецот Џени Осман, а тука се Иљасова и одличниот плејмејкер Вилкебин кој игра за Макаби Тел Авив. Не смее да се заборави и Коркмаз кој имаше одлична сезона. Се на се, имаат одличен тим кој може да стигне далеку,но само доколку почне конечно да функционира како еден тим.

ЧЕШКА – АУТСАЈДЕР

Чешка се аутсајдери во оваа група и јас очекувам 3 порази од нивна страна. Главен играч кој ќе се обиде да направи нешто е играчот на Вашингтон, Саторански. Другите играчи се главно дел од домашното првенство без поголемо интернационално искуство. Успех за нив е самиот пласман на шампионатот и се повеќе од тоа ќе биде огромно изненадување.

ПРЕДВИДУВАЊЕ:

1.САД

2.ТУРЦИЈА

3.ЈАПОНИЈА

4.ЧЕШКА