Италија – Македонија: анализа и очекувања, проблемите на Италија се нашата шанса

По освоените 4 бодови во мечевите со Израел и Албанија, Македонија гостува во Торино, кај Италија во натпреварот од 9-то претпоследно коло во квалификациите за пласман на Светското Првенство во Русија. Се знае кој е фаворит на овој меч, но Италија се соочува со огромни проблеми со повредени фудбалери, а македонските репрезентативци играат во врвна форма во своите екипи, што гарантира интересен дуел во Торино.

Македонија има квалитетен тим како никогаш досега

Македонија има квалитетни фудбалери како никогаш досега, генерацијата која го направи историскиот успех со младата селекција на Македонија која играше на Европското Првенство во Полска е сега во сениорскиот тим. Кога на тие млади херои ќе се додадат искусните Пандев, Несторовски, Алиоски, Трајковски, Ристовски и уште неколкумина јасно е дека мораме да очекуваме многу поголеми резултати од овие досегашните. Освен тоа сите репрезентативци играат одлично во своите клубови, а дел од нив се и носители на играта во своите екипи, постигнуваат голови и играат во победнички екипи. Фудбалерите од домашниот шампионат конечно имаат силни натпревари ( пред се фудбалерите на Вардар кои ќе играат во групната фаза на Лигата на Европа ). Игор Ангеловски мора да го искористи тоа, а дека е на добар пат за такво нешто дојде потврда од предходните два меча на македонската репрезентација против Израел и Албанија. На селекторот му останува да ги намести коцките кои се во негова полза, бидејќи веќе ќе нема алиби за неуспех. Искрено, квалификациите за нашата селекција се одамна завршени, но тоа не значи дека не треба да се очекуваат добри резултати од Македонија бидејќи во моментов важен е ранкингот.

Младите наметнаа победнички менталитет

Во репрезентацијата владее одлична атмосфера, а ако досега се размислуваше за позитивен резултат под кој се подразбираше да не се загуби, сега во мислите на фудбалерите, па и во мислите на македонската спортска јавност се размислува само на победи. Досега проблем беше менталитетот, но младинците во овој тим дојдоа со победнички менталитет и доколку тоа не се искористи сега, тешко дека Македонија ќе има ваква шанса во догледно време. Тоа го наметнаа младите фудбалери со настапот на Европското Првенство и тоа е нешто многу добро за македонскиот фудбал. Доколку Македонија успее да го задржи темпото на игра како на предходните натпревари против Израел и пред се мечот против Албанија, тогаш ќе можеме да очекуваме многу радости во иднина, па нема причина да не веруваме во радост и против селекции од рангот на Италија.

Вентура го смени стилот на игра на Италија

Италија видно го смени начинот на игра откако селектор на оваа репрезентација е Вентура. Сега оваа репрезентаија многу повеќе размислува за противничкиот, отколку за сопствениот гол и не се задоволува само со победи, туку задоволна е само со убедливи победи во офанзивна игра. Тоа во неколку наврати беше и меч со две острици, но Вентура не го смени своето размислување и затоа дојдоа и одличните резултати на репрезентацијата. На последните 12 натпревари Италија доживеа само еден пораз и две нерешени средби, наспроти 9-те победи, а она што повеќе импресионира е тоа што Италија на овие 12 средби постигна 32 гола, или во просек по 2.66 гола по натпревар. Единствениот пораз во овие дуели дојде од Шпанија во предпоследното коло од овие квалификации кога во Мадрид, Италија загуби со 3:0, но во одличен меч. Имено, статистички Италија беше рамноправен противник, имаше и 50% посет на топка, нешто што не е вообичаено за репрезеннтациите противници на Шпанија, а тоа е уште еден доказ за промената на стилот на игра на Италија, кој секако е во добра насока.

Италија со еден куп повредени фудбалери и со нов среден ред

Поради повреди од комбинација за составот отпаднаа плејмејкерите Марко Верати, Даниеле де Роси и Лоренцо Пелегрини. Повреден е и напаѓачот Белотиа, а најнов на оваа листа е Ел Шарави. На двата последни меча првотимци беа Белоти, Верати и Де Роси, а Пелегрини остануваше на клупата за резервни фудбалери. Белоти во овој циклус е втор стрелец, со четири гола (прв е Имобиле со шест). Вентура дополнително ги повика Роберто Инглезе, Роберто Галјардини и дебитантите Николо Барела и Брајан Кристанте. Тоа значи дека Италија во средниот ред ќе настапи во буквална смисла со вториот тим и тоа е огромна шанса за Македонија.

Вентура ќе стартува ултра напаѓачки

Селекторот на Италија, Џанпјеро Вентура, е принуден да направи бројни промени во тимот за дуелот со Македонија, а тоа ќе биде добра шанса на неколку фудбалери да покажат колку може на нив да се смета во наредниот квалификациски циклус.

Италија ќе се врати на формацијата со тројца дефанзивци, и тоа Бонучи, Барзагли и Кјелини, додека на голот ќе се најде Џанлуиџи Буфон. Организацијата на играта во средината ќе биде одговорност на Пароло од Лацио и Галјардини од Интер, додека крилните позиции ќе им бидат доделени на Дармијан и Запакоста.

Симоне Верди од Болоња и Инсиње ќе играат по страничните позиции в нападот, додека најистурен ќе биде Имобиле, кој беше човек на одлука во Скопје.

Формација 3-4-3:

Буфон; Бонучи, Барзагли, Киелини; Дармијан, Пароло, Гилјардини, Запакоста; Верди, Инсиње, Имобиле.

Ангеловски пронајде вистинска формација, но ги блокира квалитетите на Алиоски

Игор Ангеловски во овие квалификации проба еден куп формации 5-3-2, 5-4-1, 4-2-3-1, 4-4-2 па можеби и уште некоја формациска поставеност во зависност од квалитетот и силата на противникот, но конечно се чини дека ја најде вистинската поставеност на предходните два меча со Израел и Албанија. Сега Ангеловски ќе настапи повторно во формација 3-5-2, која лесно ќе се трансформира во 5-3-1-1 кога ќе бидеме во дефанзива. Тимот ќе биде речиси ист како и на тие два меча, со тоа што овој пат ќе бидеме можеби малку ослабени во одбраната поради суспензијата на Кире Ристевски, но затоа ќе бидеме засилени во средниот ред со враќањето на Хасани во тимот.

На голот очекувано ќе се најде Столе Димитриевски, во одбраната на централните позиции ќе играат Велковски, Муслиу кои беа одлични на предходните мечеви, како и замената за Кире Ристевски, Ѓоко Зајков. На крилните позиции ќе играат Ристовски и Алиоски, додека во средината организатори ќе бидат Барди и Спировски, а Хасани ќе се најде во првиот тим на местото на Николов. Најистурени во нападот ќе бидат Пандев и Несторовски.

Формација 5-3-2:

Димитриевски; Велковски, Муслиу, Зајков, Ристовски, Алиоски; Барди, Хасани, Спировски; Пандев, Несторовски.

Проблемот во оваа формација е Алиоски, кој мора да се користи многу повеќе во нападот, а Ангеловски се чини не ја научи грешката од мечот со Албанија. На тој меч, Македонија беше најопасна во моментите кога Алијоски беше прекомандуван во нападот на десната страна и според тоа факт е дека Алиоски неможе на оваа позиија на која ќе настапи да ги искаже своите квалитети.

Според букмејкерите, Македонија е во друштво со аматерите

Јасно е дека Италија е апсолутен фаворит на овој меч и се освен нивна победа ќе биде големо изненадување, но букмејкерите им дале преголема фаворитска улога според коефициентите, а нас не ставиле во друштво со аматерските репрезентации. За победа на Италија коефициентот во бет365 е 1.07, додека за реми е 15.00. Од друга страна за победа на Македонија во бет365 коефициентот е дури 41.00. Многу привлечна изгледа играта Двете екипи да постигнат гол, бидејќи најчесто коефициентот за оваа игра варира од 1.50 до 2.30, но овој пат коефициентот е дури 4.00 во бет365 и дефинитивно е вреден за ризикување.