Стартот на сезоната во Премиер Лигата најавува неизвесност околу шампионската титула, околу местата кои водат во Европа следнатасезона, но и во битката за опстанок. И покрај тоа што поминаа само две кола во новата сезона, фудбалските експерти веќе почнаа со предвидувањата за тоа кој менаџер прв ќе го напушти тимот или пак ќе биде сменет, а во сите предвидувања најчесто се споменуваат имињата на Рафаел Бенитез, Марк Хјуз, Славен Билиќ и Крег Шекспир.
Рафаел Бенитез ( Њукасл )
Еден од фаворитите на букмејкерите за прв да го напушти својот тим е Рафаел Бенитез, за кој фудбалските експерти веруваат дека ќе биде само уште една катастрофа за тимот под водство на Мајк Ешли како сопственик на Њукасл. Поранешниот менаџер на Реал Мадрид, Валенсија, Челзи, Ливерпул и Наполи, разбирливо е популарен кај навивачите на тимот бидејќи успеа експресно да ја врати екипата во Премиер Лигата, но сега се појавуваат се повеќе фрустрирани фанови поради стратегијата на тимот на трансфер пазарот, па и по почетните два порази во Премиер Лигата.
Бенитез, наводно беше близу до поднесување на оставка уште на почетокот на месец Јуни, кога главниот скаут на тимот Греам Кар поднесе оставка, а Бенитез не беше многу среќен поради тоа. Само две вистински засилувања има Бенитез во својот тим и тоа го става во тешка положба, апоразите од Тотенхем и Хадерсфилд само дотурија масло на огнот.
57-годишниот Бенитез поднесе оставка од своите позиции во Валенсија и Наполи, што укажува на тоа дека нема да се двоуми да поднесе оставка и во Њукасл доколку работите во многу брзо време не тргнат онака како што тој има замислено. Ако Њукасл продолжи со лошиот старт на сезоната, а во меѓувреме не му се исполнат барањата на Бенитез за нови засилувања што е многу веројатно бидејќи се ближи крајот на преодниот рок, Ешли ќе треба да бара нов менаџер многу побрзо од очекувањата. Можеби нема да биде првиот менаџер што ќе напушти клуб во Премиер Лигата оваа сезона, но според експертските предвидувања голема е веројатноста тоа да се случи пред Божиќ.
Марк Хјуз ( Стоук Сити )
Работите не изгледаа добро за Марк Хјуз пред стартот на сезоната. Кредитното потпишување со Курт Зума кој дојде од Челзи ќе го ставиме настрана, исто како и трансферите на Дарен Флечер, Чупо Мотинг и Хесе бидејќи и покрај тоа ова беше страшно лето за Стоук и Хјуз е веќе при крајот со своето трпение. Серијата од само девет поени во послените 11 натпревари на крајот од минатата сезона покажаа дека Хјуз тргна во лош правец, а многу навивачи на клубот ја изгубија вербата во нивниот менаџер. Заминувањето на Марко Арнаутовиќ во Вест Хем само ја зголеми веројатноста Стоук да продолжи на ист начин како што ја заврши минатата сезона, но по стартниот пораз од Евертон се случи малото чудо односно победата над Арсенал.
Сепак ако се види распоредот на екипата на почетокот на сезоната каде во првите осум натпревари овој тим ќе треба да одигра против екипи како Манчестер Јунајтед, Челзи и Манчестер Сити, тешко дека Хјуз и Стоук ќе можат да приредат уште едно изненадување како против Арсенал, па очекувањата се дека по првите десетина кола екипата ќе биде при крајот на табелата во Премиер Лигата, што го вбројува Марк Хјуз како еден од главните кандидати за добивање на отказ или поднесување на оставка во својата екипа.
Славен Билиќ ( Вест Хем )
Тешката втора сезона на Славен Билиќ во Вест Хем го стави овој стручњак на работ на провалијата, а притисокот врз хрватот сега е зголемен поради тоа што управата на тимот му ги исполни неговите желби и донесе квалитетни засилувања во текот на летото. Џо Харт, Арнаутовиќ, Пабло Забалета и Хавиер Ернандез се четирите врвни фудбалери кои дојдоа во овој тим со што се очекуваше да го направат тимот многу посилен за разлика од минатата сезона, но стартот на првенството не го покажува тоа.
Факт е дека тие иако изгледаат како одлични засилувања не можат да се усогласат со контра-напаѓачката филозофија на нивниот сегашен менаџер па затоа дојдоа и поразите во првите две кола од Манчестер Јунајтед и Саутемптон со очајна гол разлика од 7 примени гола и два постигнати. Билиќ ќе мора повторно да го воспостави брзото темпо на екипата, што беше случај во сезоната 2015/16 но само во првите два месеца или да им се придружи на Хјуз и Бенитез во фаворитските улоги за брзо напуштање или добивање на оставки во своите екипи. Сепак со овие нови потписи, па и со искуството од Премиер Лигата без разлика на очајниот старт, овој стратег веројатно нема да биде првиот кој што ќе го напушти тимот или ќе добие отказ.
Крег Шекспир ( Лестер Сити )
Лестер Сити мораа драматично да ги променат своите амбиции по разочарувачкиот – иако реален финиш во средината на табелата минатата сезона. Крег Шекспир изгледаше како краткорочно решение по заминувањето на Раниери, но сепак првите луѓе на тимот се решија да му дадат поголема шанса на овој млад стратег. 
Сепак тие патуваа во Арсенал во првото коло, додека во следното гостување одат кај Манчестер Јунајтед, пред да бидат домаќини на Челзи во четвртото коло, што значи дека Шекспир и Лестер и покрај победата во второто коло над Брингтон, би можеле да бидат на дното на табелата на почетокот од сезоната, а кога ќе се тргне во тој правец тешко е да се вратиш на вистинскиот пат. Газдата на Лестер беше толку немилосрден со Клаудио Раниери кој му донесе и шампионска титула со премал буџет, па сигурно нема да се двоуми да го смени Шекспир дури и на почетокот на сезоната без разлика на тешкиот распоред на тимот. Токму затоа според нас Шекспир и не е така лош избор доколку сакате да се обложите на тоа кој менаџер ќе биде најбргу сменет оваа сезона во Премиер Лигата.
Be the first to comment