Со веќе освоен еден трофеј, Лестер Сити ја започнува својата сезона во Премиер лигата во сабота против Вулверхемптон на стадионот Кинг Пауер.
Додека Брендан Роџерс се подготвува за трета целосна сезона на чело на Лисиците, новото име на менаџерското место кај Вулвс – Бруно Лаге ќе се обиде да стартува со позитивен исход.
Лестер засилен по пласман во ЛШ
Колапсот на Лестер Сити на крајот на сезоната заврши како фатален во обидот да се вратат во Лигата на шампионите. Лестер имаше три порази од последните четири натпревари во Премиер лигата и тоа беше доволно за да завршат само на петтото место кое водеше во Лигата на Европа.
Но Лестер успеа да стигне до нивниот прв триумф во ФА Купот, а тоа значеше и борба за прв трофеј сезонава со актуелниот шампион Сити во Комјунити Шилд.
Соочувајќи се со екипата на Манчестер Сити која играше со шарен состав, „Лисиците“ славеа за старт со трофеј сезонава, откако пред крајот на мечот Келечи Ихеаначо, ладнокрвно да реализира од пенал за победа.
Освојувањето на трофејот е една работа, но поддржувачите на Лестер сакаат враќање во Лигата на шампионите, а сега засилени со имиња како Патсон Дака, Бубакари Сумаре и Рајан Бертранд имаат реални шанси за пласман на едно од првите четири места сезонава.
Вулвс со нов менаџер но со стари амбиции
Тотенхем го грабна Нуно Еспирито Санто, а уште еден Португалец и поранешен тренер на Бенфика, Бруно Лаге, пристигна во Вулверхемптон и веднаш донесе неколку промени во екипата која повторно ќе биде на португалски погон.
Далеку беше Вулвс од пласман во Европа минатата сезона, а тоа беше целта. Целта е иста и сезонава, а според играчкиот кадар Вулвс може да дојде до такво нешто.
Враќањето на Хименез во тимот по повредата беше добредојдено, додека новите засилувања Франциско Тринкао, Џерсон Москера, Рајан Аит-Нури и Хозе Са дефинитивно ќе донесат полетност во екипата.
Шарена предсезона имаше оваа екипа, со победи над Бетис и Ковентри, но и со порази од Селта и Лас Палмас. Ќе му треба повеќе време на Лаго за да го наметне својот стил на игра кај Волците.
Be the first to comment