ЕУРО анализа: Македонија – Холандија, позитивен резултат за одјава од ЕУРО и за последниот меч на Пандев

На Јохан Кројф арената во Амстердам, во понеделник од 18:00 часот Македонија ќе го одигра последниот натпревар на ЕУРО 2020 и тоа против домаќинот Холандија.

Овој меч за домаќинот нема значење, но за Македонија има големо, особено што овој меч ќе биде последен за легендата на македонскиот фудбал Горан Пандев во репрезентативниот дрес.

Да се заборават двата порази во групата

Македонските репрезентативци мораат да ги заборават двата порази во групата од Австрија и Украина, ако сакаат да одиграат добар меч со Холандија. Како за крај и одјавување од шампионатот, одлично би било да се дојде до позитивен резултат против Холандија на нејзин терен. А позитивен резултат ќе биде и реми. Мотивација кога се носи дресот на својата земја мора да има. Мотивација е и самото Европско Првенство, па и самата Холандија.

Голема е веројатноста дека селекторот Ангеловски овој пат ќе излезе со нешто поофанзивна формациска поставеност, а шанса во првиот тим би требало да добие и Александар Трајковски кои со своето влегување во игра, целосно го смени текот на натпреварот со Украина. Можно е да има и дополнителна ротација – Стефан Ристовски да стартува на десната бековска позиција, а на местото на Николов да стартува Кире Ристевски или Бејтулаи.

Се за ЕУРО 2021 на едно место, домаќини, групи, распоред, најава, анализа, очекувања, предлог типови, ковид протоколи, правила, рестрикции

Последен натпревар за Горан Пандев, можеби и за Ангеловски

Капитенот Горан Пандев на официјалната прес-конференција потврди дека ова е негов последен натпревар во кариерата во дресот на Македонија.

„Да, ова за мене е последен натпревар во дресот на македонска репрезентација. И јас и моите колеги заедно со селекторот, направивме нешто што не знам дали ќе биде повторено. Сакам да им порачам на моите соиграчи да се пласираат на Светското првенство, станува збор за фантастични играчи кои играат во големи клубови и верувам дека можат тоа да го остварат“, изјави Пандев.

Самиот факт дека овој меч е последен за капитенот, треба да биде дополнителна мотивација за сите во селекцијата да одиграат за него и да му овозможат да се прости од националниот дрес со позитивен резултат, онака како што доликува на еден великан.

Освен тоа, овој дуел може да биде и последен за селекторот Игор Ангеловски, на кого договорот му истекува веднаш по завршувањето на Европското Првенство.

Ќе има ротации во холандскиот состав

Холандија победи на првите два меча и си ја исполни првата цел – пласман во следната фаза. Секако ќе бидат први во групата, без разлика на резултатот од овој натпревар, поради подобриот меѓусебен дуел со Австрија и Украина. Тоа значи дека холанѓаните на натпреварот ќе истрчаат растеретено и ќе играат без притисок. Колку тоа може да биде добро по Македонија, може да биде и лошо – некогаш полесно се игра без притисок. Селекторот Де Бур, најави ротации во составот, но и најави дека нема да си игра со реномето и името на Холандија. Ска победа и против Македонија за комплетирање на впечатокот од групната фаза. Без разлика со каков тим ќе излезе на терен, ќе биде фаворит за победа, но не би требало да има премногу ротации, а оние најглавните фудбалери секако ќе го стартуваат натпреварот.

Прогноза

Последен меч за Македонија на ЕУРО и последна шанса за првиот историски бод. Но во исто време ова е најтежок меч на шампионатот. Има мотиви кај македонските фудбалери, а најавите се и поофанзивен пристап. Холандија ќе игра растеретено, но на победа и онака како што единствено знаат – напаѓачки. Би требало да има голови, да биде ова ефикасен натпревар. Можете да пробате со 3+, но коефициентот за ГГ е одличен.