Русија и Данска со судир на Паркен стадионот во Копенхаген во понеделник вечерта ќе ги завршат настапите во групната фаза на ЕУРО 2020. Јасно е дека Белгија веќе обезбеди пласман во следната фаза, додека на чекор од тоа е Русија, која може да помине понатаму дури и со пораз, доколку Финска не извлече некој бод од Белгија.
Од друга страна, Данска може да се надева на нешто само со победа. Во тој случај би била трета и ќе се надева дека ќе биде една од најдобрите четири третопласирани селекции кои ќе се пласираат во нокаут фазата.
Важно за русите е да не загубат
Русија ја започна својата мисија во групата Б со разочарувачки пораз од Белгија со 3:0 во Санкт Петербург, но победата со 1:0 над Финска ги постави во силна позиција пред нивниот последен натпревар во оваа група.
Соло акцијата на Алексеј Миранчук беше доволна за победа над Финска во средата вечерта, а резултатот ги смести Русите на второто место во групата. Важно за нив е да не загубат.
Победата ќе осигури дека тие ќе се пласираат во следната фаза, иако нерешено ќе биде исто така доволно за да се квалификуваат како втори ако Финска не успее да ја победи Белгија на другиот натпревар истата вечер.
Третата позиција, секако, може да биде доволна за напредување, но Русија нема да сака да ризикува и затоа ќе биде решена да остане барем непоразена од Данска во Копенхаген.
Реално, Русија одигра под своите можности, особено што играше на домашен терен – дури може да биде и среќна што освои три бода со Финска, а сега ќе има многу потешка задача во Данска.
Данска може и до второто место
Ова е едно крајно емотивно натпреварување за Данска поради здравствените проблеми на Кристијан Ериксен на нивниот воведен натпревар против Финска на 12-ти јуни.
Ериксен сега е отпуштен од болница по успешната операција и вградувањето на дефибрилатор, а Данците ќе го напуштат ова натпреварување како херои, без оглед на тоа што ќе се случува на нивниот последен натпревар во групата Б.
Данска по поразот од Финска со 1:0, одигра одличен меч против Белгија понесена од еден куп емоции. Со голот на Поулсен по 90 секунди игра водеа со 1:0. Ги надиграа белгијците кои се едни од фаворитите за златото. Упатија дури 22 шутеви кон противничкиот гол, за разлика од шесте шута на Белгија, но на крајот загубија со 1:2.
Сега се на дното со нула поени, но тие се уште имаат шанса за пласман во осминафиналето.
Тимот на Хјулманд би завршил и втор ако ја победи Русија со два или повеќе гола разлика, а Финска загуби против Белгија, што не е невозможен сплет на околности.
Прогноза
Данска игра дома, Данска игра за Ериксен и Данска има доволно квалитет за пласман во следната фаза. Ако тие одиграат како на мечот со Белгија, не треба да се грижат воопшто за овој дуел. Русија тешко играше и на домашно тло, а тие секогаш се послаби кога играат далеку од дома. Сега во Копенхаген ќе играат дефанзивно, за разлика од данците кои ќе нападнат од самиот старт бидејќи немаат што да загубат на овој меч.
Be the first to comment