По репрезентативната пауза, во Премиер Лигата се враќаат натпреварите од 13-то коло. Има доста интересни средби и едно големо дерби. Но ова коло големо внимание привлекува и враќањето на Мурињо во Англија и неговото деби на клупата на Тотенхем.
Вест Хем – Тотенхем – 2
Тешко е да се предвиди овој меч, односно дебито на Мурињо на клупата на Спарси. Како ќе изгледа Тотенхем после ерата на Покетино ? Дали Мурињо ќе направи брзи промени ? Има уште многу прашања, на кој во моментов не може да се даде соодветен и точен одговор. Но едно е јасно – Мурињо ќе има само три тренинзи со своите нови играчи пред овој меч. Но има среќа што игра против Вест Хем кој нема победа на последните пет меча и се наоѓа во лоша форма.
Арсенал – Саутемптон – 1
Арсенал не знае за победа на четири натпревари по ред и тоа против екипи со понизок ранг. Но кога ќе се погледне серијата на Саутемптон, тие четири меча на Арсенал изгледаат како шега. Саутемптон нема победа на седум натпревари по ред во лигата иима катастрофална гол разлика од 5:20. Затоа мислам дека Саутемптон е одлична можност за Арсенал да се врати на победите, а победата е важна и за Емери на кого му се заканува отказ.
Бурнемут – Вулверхемптон – ППХ
Двете екипиимаат ист број на бодови на табелата, но Вулвс поради подобрата гол разлика е едно место погоре. Кога игра на домашен терен, Бурнемут може да победи против секого, но на овој меч тоа ќе биде единствената предност за нив. Вулвс е поквалитетен тим, но нивниот проблем сезонава се вика Лига на Европа. Тие очигледно дека не се спремни да играат подеднакво добро на два фронта, па тоа им одзеде неколку бодови досега. Очекувам тврд и неизвесен меч.
Брајтон – Лестер – 2
Како игра сезонава екипата на Лестер под водство на Брендон Роџерс, тие веројатно ќе обезбедат пласман во Лигата на Шампиони за следната сезона. Се наоѓаат во одлична форма и имаат четири победи по ред, меѓу кои против Арсенал и онаа неверојатна победа над Саутемптон со 0:9. Брајтон се бори за опстанок сезонава, но им оди добро досега и се на средината на табелата па веќе играат без притисок. Но овој пат се аутсајдери и покрај домашниот терен.
Кристал Палас – Ливерпул – 2
Долго време Кристал Палас беше при врвот на табелата. Но на последните четири натпревари има само еден освоен бод, па сега се некаде на средината на табелата. За Ливерпул не треба да се трошат премногу зборови. Но сега ќе бидат значително ослабени. Салах е повреден и веројатно нема да игра на овој меч, а под знак прашалник е и настапот на левиот бек Робертсон. Токму во овие повреди, домаќинот ја гледа својата шанса за изненадување.
Евертон – Норвич – 1
Норвич предводен од Пуки на стартот од сезоната имаше изненадувања, но остана само на тоа. Имаат само две победи до сега ( едната е над Сити ) и едно реми. Последни се на табелата и се најголем кандидат за преселба во Чемпионшип. Евертон исто така ги разочара своите навивачи. Тие влегоа со големи амбиции во оваа сезона но се наоѓаат на 15-то место на табелата. Сепак, имаат реми и победа по ред, па сега се надеваат дека конечно ќе врзат подолга успешна серија.
Ватфорд – Барнли – 1Х
Колку лошо стартуваше екипата на Ватфорд, дури сегашната 18-та позиција на табелата изгледа добро. Имаат само една победа и пет ремија до сега, но победата дојде на последниот дуел над Норвич на гости. Сега сите со нетрпение го очекуваат овој меч и ја сакаат првата победа на домашен терен оваа сезона. Но Барнли е одличен и е на 10-то место. Тие се тврда екипа и за многу посилни екипи од Ватфорд.
Манчестер Сити – Челзи – 3+
Ова е дербито на денот, но и дербито на колото во англиската Премиер Лига. Сити е фаворит и во тоа нема никаква дилема, но Челзи е пред нив на табелата и игра неверојатно добро. Тие под водство на Лампарт сменија многу работи, суштински нешта, а тоа досега вроди со плод. Играат офанзивно, а оние младите играат над сите очекувања. Сити досега разочара и веќе заостанува со девет бодови во однос на Ливерпул. Секој загубен бод за нив до крајот на сезоната ќе значи одалечување од целта – шампионската титула. Минатото коло Пеп загуби од Ливерпул и сега најавува дека неговата екипа ќе направи се, за да слави во второто дерби во серија.
Шефилд Јунајтед – Манчестер Јунајтед – 0-2
Кога ќе се погледне табелата, можете да се изненадите. Шефилд е пред Јунајтед за еден бод. Овој нов премиер лигаш ги надмина сите очекувања, кои пред сезоната беа борба за опстанок. Тимот има неверојатна цврстина, а нивниот дефанзивен систем е проблем за сите. Впрочем, тие ја имаат втората најдобра одбрана досега во лигата со само девет примени гола. Солскер од друга страна пак не може да излезе на крај со своите проблеми. Манчестер сеуште е десеткуван и ќе му биде тешко да го скрши отпорот на домаќинот.
Астон Вила – Њукасл – ППХ
Астон Вила е благ фаворит, но само поради домашниот терен. Њукасл врза две победи по ред и избега од опасната зона, а пак домаќинот на овој меч има три порази во серија. Ова е тежок меч за предвидување, а јас очекувам цврста игра од двете страни.
Be the first to comment