СП во кошарка – Група Ф: Грција сака медал, Бразил никогаш послаб

август 30, 2019 Jovica Светско првенство во кошарка – Кина 2019

Вториот по големина град во источниот регион на Кина, Нанџинг ќе биде домаќин на групата Ф од Светското првенство во кошарка. Групата е исклучитлно интересна, фаворит е Грција, но останатите три селекции се речиси на исто рамниште: Црна Гора, Бразил и Нов Зеланд, па неизвесноста ќе биде на високо ниво.

ГРЦИЈА – Со Јанис, Грција може и до финале

Јанис Антетокумпо и веќе се е кажано. Што да се каже за селекцијата во која игра моментално еден од најдобрите играчи во светот. Грците се дојдени со големи амбиции и атакуваат на медал. Ветераните како Борусис, Калатес, Принтезис и Папаниколау имаат неверојатно искуство, а младите и полетни играчи прават еден одличен спој. Не би требало д имаат никаков проблем во групата, а беа одлични и во подготовките каде единствено загубија од Србија и тоа по продолженија. Тимот изгледа спремен за да стигне далеку, можеби и до самиот крај на шампионатот.

БРАЗИЛ – Кариоките никогаш не биле со послаб тим на СП

Бразилците изгледаат импресивно. Во подготовките славеа над Кина на два пати, Црна Гора, Аргентина, Франција и Уругвај, а загубија во вториот меч против Франција. Сепак, мора да се напомене дека според имињта оваа селекција изгледа дека никогаш послаба не дошла на едно СП. Главниот играч Леандро Барбоса веќе е во поодминати години, додека поранешниот НБА центар и шампион Андерсон Варежао не игра на високо ниво веќе подолго време.

Селекторот Ацо Петровиќ се надева дека искуството ќе пресуди. Кога сме кај искуството, интересно е тоа што Андерсон Варежао, Леандро Барбоса и Алекс Гарсија го играат својот петти – да петти Светски куп. Сите тројца дебитираа на Светскиот куп во 2002 година во Индијанаполис и сите тројца играа на секој Светски куп оттогаш.

ЦРНА ГОРА – Вучевиќ и само Вучевиќ

Никола Вучевиќ ќе го предводи овој тим. Играчот на Орландо Меџик ќе го носи овој црногорски состав колку што може, иако искрено, тоа не мора да значи дека ќе ја минат групната фаза. 28-годишниот НБА ол-стар е одличен, но нема голема помош од соиграчите.

Да, тука се Милко Бјелица, Бојан Дабjeвиќ и Петар Поповиќ но кога ќе се види длабочината на Грција и Бразил, Црна Гора изгледа послабо. Ова е прво учество за нив на Светските првенства, доаѓаат со големи импресии и евентуален пласман во следната рунда ќе биде исто како да го освоиле златото.

НОВ ЗЕЛАНД – АУТСАЈДЕР

Стигнавме до аутсајдерот во Групата. Но во другите групи ако имаше аутсајдери без шанси или со мали шанси за прогрес, тука ситуацијата е обратна. Нов Зеланд е аутсајдер но со добри шанси за пласман во следната фаза. Тие се надеваат на добар процент на шутевите за три поени, а имаат одлични шутери. Ако им тргне шутот тогаш ќе можат да се носат и со Бразил и со Црна Гора. Тоа добро го покажаа против Италија во последниот подготвителен меч славејќи со 88:82. Браќата Вестер (Кори и Таи) ќе бидат во првите редови, при што ветераните Исак Фот и Том Аберкомби ќе помогнат со своето искуство.