Вардар е домаќин на Фенербахче во првиот дуел од плеј-оф рундата на Лигата на Европа, но во најнезгоден момент за тимот, но Вардар и во минатото бил во проблеми, во поголеми проблеми од овие сегашните и секогаш го наоѓал патот до излезот. Зошто да не биде така и овој пат.
Вардар по нотите на Јаневски ќе оди на изненадување
Македонскиот шампион конечно по долгогодишно чекање успеа да го урне проклетството на македонските шампиони во квалификациите на Лигата на Шампионите и го мина првото коло елиминирајќи го шведски Малме кој по ремито во Шведска, во Струмица беше поразен со 3:1. Сепак ако за добро упатените познавачи на македонскиот фудбал тоа не беше големо изненадување, елиминацијата на Малме силно одекна низ фудбалска Европа како голема сензација. Преку ноќ Седловски ги собра симпатиите на пошироката јавност, а електронските медиуми го величеа него за тој успех, иако веројатно тој е најмалку заслужен за тоа. Следеше Копенхаген и победа во Скопје од 1:0, но на гости иако Вардар не одигра лош меч доживеа пораз од 4:1, примајќи дури два гола со играч повеќе во последните 15 минути, а тоа беше доволно за бродот да почне да тоне. Капак на оваа елиминација беше и поразот во првото коло од домашниот шампион против Шкендија. Во меѓувреме сопственикот на тимот, Сергеј Самсоненко најави дека ќе го напушти тимот по крајот на сезоната, што дефинитивно е голем удар пред овој двомеч со Фенербахче, а капак на проблемите стави Седловски кој на само два дена пред дуелот со Фенербахче си поднесе оставка, па оние кои го величеа почнаа да фрлаат камења по него. Сите овие случувања укажуваат на тоа дека во Вардар нешто не е како што треба, а во една ваква атмосфера тешко е да се игра против екипа како Фенербахче.
И покрај сите овие проблеми, дури падна чудно тоа што има и позитивни работи за екипата. Имено, Вардар најде експресно решение за тренерското столче и тоа во името на вардаровата легенда Чедомир Јаневски кој долги години го собираше своето искуство во западна Европа, а беше и селектор на македонската репрезентација. Вардар ангажираше и две нови имиња и тоа бразилскиот напаѓач Итало кој се очекува да го замени Балотели кои се пресели во Катар, како и Куајнор од Гана кој ќе го засили дефанзивниот среден ред.
Сепак ниту Јаневски, ниту двете засилувања не можат преку ноќ да ја променат негативната атмосфера во тимот. Јаневски и официјално ќе го предводи тимот против Фенер, иако имаше најави дека на клупата ќе седне помошникот Васовски, но тој не ги знае доволно фудбалерите, без ниту еден тренинг не може да ги реализира своите замисли и тешко е Вардар во една ваква ситуација да се надева на чудо и пласман во групната фаза на Лигата на Европа. Новиот тренер не може да смени ништо преку ноќ, иако познавајќи го во продолжување на сезоната дефинитивно ќе им даде поголема минутажа на младите фудбалери како Велковски, Исени и останатите. Јаневски исто така многу често знае да ја менува формациската поставеност на фудбалерите од класичната 4-4-2, до 4-2-3-1, па и 4-1-2-3, но сега е премногу рано да говориме на овие теми. За овој меч според сите најави се очекува Вардар да истрча со речиси истиот тим како и на предходните средби, со исклучок на Балотели кој си замина од тимот. Реализацијата беше главен проблем за Вардар досега, а по заминувањето на првиот напаѓач тоа може да биде уште поголем проблем, без разлика дали ќе настапи новото засилување Итало со оглед на тоа што овој фудбалер има одработено само неколку тренинзи со својата нова екипа. Сепак “Телеком Арената” во Скопје ќе биде исполнета до последно место, а Комити знаат да направат атмосфера и бидат 12-от играч на Вардар, па така се очекува да биде и овој пат.
Можен состав:
Формација 4-2-3-1
Гачевски; Хамбарџумијан, Грнчаров, Новак, Демири; Николов, Спировски; Барсегјан, Фелипе, Којашевиќ; Блажевски ( Итало )
Фенербахче има големи амбиции оваа сезона
“Гигантот од Босфорот” како што многумина милуваат да го нарекуваат тимот на Фенербахче е апсолутен фаворит на овој меч, иако не мораше да биде баш така, доколку не се случеа сите веќе споменати проблеми во Вардар. 
Екипата во Скопје пристигна во најсилен состав и ништо не препушта на случајноста, иако во турските медиуми на неколку пати беше наведено дека Качаман ќе калкулира со составот на овој натпревар. Фенер минатата сезона и покрај големите амбиции ги разочара своите навивачи завршувајќи на 3-то место на табелата во турската Супер лига и тоа со заостанување од дури 13 бода од шампионот Бешикташ.
Токму затоа раководството на тимот летово не штедеше и имаше одличен преоден рок доведувајќи неколку квалитетни имиња, па сегаслободно може да се заклучи дека Фенербахче има далеку посилен тим за разлика од минатите сезони. Фенер потроши нешто повеќе од 20 милиони евра за засилувања, меѓу кои Гиулиано од Зенит, Солдадо од Виљареал, Дидар од Монако, Валбуена од Лион, Исла од Каљари, Екичи од Транзоспори Камени од Малага, а тука секако е и трансферот на еден од најголемите надежи на македонскиот фудбал, Елиф Елмас од Работнички, кој за жал нема да настапи на овој меч поради проблемите со неговите години и регистрацијата во турскиот тим. Ако на овие фудбалери се додадат Ван Перси, Шкртел, Топал, Којбаши, Туфан и уште неколкумина, јасно е дека овој тим има далеку поголеми амбиции во Лигата на Европа, па пласманот во групната фаза од овој тим не го доведуваат ниту под знак прашалник.
Хендикеп за овој тим е тоа што имаат многу нови фудбалери за кои ќе треба доста време за да се воиграат со староседелците во тимот, а тој проблем излезе на виделина уште во подготвителните натпревари, а кулминираше со стартот на домашниот шампионат. Фенербахче стартуваше со три порази, по што следеа две нерешени средби против Билбао и Монако за подигање на атмосферата во тимот. Следеа двата меча со Штурм во минатото коло на Лигата на Европа на кои турскиот тим иако излезе како победник, според играта на двата меча не го заслужи тоа. Прво славеше во Австрија со 1:2, а головите ги постигна во единствените шутеви во рамки на голот, а во вториот меч во Истанбул резултатот беше 1:1 и повторно Штурм ги имаше поголемите шанси на мечот, а Фенер стравуваше од елиминација до последните моменти. Во овој меч против Вардар, Фенербахче ќе влезе по разочарувачкото реми против новиот турски Суперлигаш Гозтепе со кого одигра 2:2.
Можен состав:
Формација 4-3-3
Камени; Исла, Нојштатер, Шкртел, Калдирим; Туфан, Потук, Де Соуза; Дидар, Валбуена, Ван Перси.
Букмејкерите ги препознаа проблемите во Вардар
И двете екипи си имаат свои проблеми иако длеку поголеми проблеми има Вардар, а тоа добро го прочитаа и букмејкерите кои му даваат се поголеми шанси на Фенербахче, па коефициентот за нивна победа паѓа се повеќе и повеќе. Ако до пред некој ден за победа на Фенер ќе добиевте квота 1.75, сега во бет365 би добиле 1.45, за реми коефициентот е 4.20, додека за победа на Вардар е 7.50. Сепак и покрај се мораме да заклучиме дека ризокот е преголем за еден така мал коефициент за Фенербахче, а Вардар и покрај се е потценет иако имаквалитет во своите редови да извлече поволен резултат, барем на првиот меч во Скопје.
Наш предлог:
Двете екипи да постигнат гол @ 2.00
Be the first to comment