Денес на програмата се играат реванш осминафиналните дуели од Лигата на шампиони, а во фокусот секако ќе биде дуелот помеѓу Баерн Минхен и ПСЖ на „Алијанџ Арена“.
Овој дуел секако привлече најмногу внимание од сите осминафинални дуели бидејќи ќе мора да биде елиминиран еден од главните фаворити за трофејот во Лигата на шампиони. Поради тоа овој дуел го доби епитетот „финале пред финале“, а првата рунда во Париз ја доби Баерн Минхен со 1:0.
Баерн нема да ја чува предноста
Баерн Минхен после мундијалската пауза имаше мала криза во играта, но и резултатите и токму мечот во Париз беше пресвртница во сезоната за Баварците. Од тогаш почна позитивната серија за Баерн, кој се врати на врвот во Бундеслигата, но секако главна цел за овој тим ќе биде трофејот во Лигата на шампиони. Баерн уште во осминафиналето го доби еден од најтешките противници, но во првиот меч покажа дека овој тим е како создаден за големи натпревари. За разлика од првиот меч сега во тимот се враќа Садио Мане, кој беше повреден подолго време. Проблем за Баерн може да биде десната бековска позиција, бидејќи Павард е под суспензија, а тренерот Нагелсман не му верува на Кансело. Секако, Баерн има голема предност од првиот меч, но никако не смее да се опушти бидејќи ПСЖ е способен да победи два разлика на секој стадион во Европа. Поради тоа се очекува Баерн да не ја чува предноста од првиот меч, туку пред своите навивачи ќе се обиде да дојде до уште една победа.
ПСЖ нема лесно да се предаде
Јасно е дека проектот на ПСЖ е направен за освојување на Лигата на шампиони и тоа е примарна цел секоја сезона за „светците“. Поради тоа испаѓање во оваа фаза ќе биде катастрофа за скапоцените ѕвезди на ПСЖ, без разлика што играат против еден од фаворитите. ПСЖ самиот е виновен што доби тежок противник бидејќи заврши на второто место во групата, па ждребот беше немилосрден за нив. Инаку „светците“ не играат супериорно од почетокот на сезоната, во Франција едноставно немаат конкуренција, додека во ЛШ не се доминантни. Меѓутоа, тимот на ПСЖ е составен од фудбалери кои можат да решат натпревар во секој момент, па и покрај негативата за нив ништо не е завршено и ќе се обидат да победат со два гола разлика. За разлика од првиот меч ќе го имаат Мбапе од првата минута, а младиот Французин и оваа сезона е најдобриот поединец во тимот. Проблем за тренерот е што нема да може да смета на Нејмар, кој мора да оди на операција и за него сезоната е завршена.
Очекување
Дуел на два гиганти кои се едни од најсилните во Европа, па се очекува возбудлив натпревар без многу калкулации. Тоа е предуслов за ефикасен меч со многу голови.
Be the first to comment