Денес има голема понуда за обложување, но фокусот секако ќе биде на големото дерби во Серија А помеѓу Рома и Јувентус.
Рома се бори за пласман во Топ 4 и овој меч за нив е од исклучително значење, од друга страна Јувентус и покрај казната дојде во позиција да се бори за Европа, па сигурно ќе сака да освои бодови во Рим.
Рома се бори за Лига на шампиони
Рома одамна испадна од трката за титулата, но главна цел на овој тим оваа сезона е пласман во Топ 4 и билет за Лигата на шампиони. Рома моментално е на 5-то место на табелата и со победа ќе се искачи на четвртата позиција, па овој дуел за нив е од искличително значење. Особено после големиот кикс минатото коло и поразот од Кремонезе, па „волчицата“ нема право на уште еден кикс. На гости им доаѓа големиот ривал Јувентус, против кого Рома секогаш има специјален мотив и ќе биде подрена од преполниот стадион. Меѓутоа, за Рома ова воопшто нема да биде лесен натпревар бидејќи Јувентус доаѓа во одлична форма. Сигурно посебен мотив ќе има Пауло Дибала, кој е најдобар поединец во Рома, а до пред неколку месеци го носеше дресот на Јувентус. Мурињо и овој пат нема да биде на клупата бидејќи е под суспензија, што често се случува оваа сезона. Што се однесува до тимот, Мурињо нема да може да смета само на Пелегрини, кој поради болест ќе го пропушти дербито.
Јувентус е во одлична форма
Јувентус и покрај казната од 15 бода дојде во позиција да се бори за излез во Европа, па дури и за пласман во Топ 4, иако тоа изгледаше незамисливо до пред неколку недели. „Старата дама“ е во одлична форма и влезе во серија од четири победи, па ги искористи киксовите на конкуренцијата. Особено доколку ги освои трите бода на овој меч „бјанконерите“ ќе се доближат на само девет бода од 4-то место, а Алегри изјави дека тоа место ќе биде како освојување на титула за тимот. Друга шанса да дојде до Лигата на шампиони ќе биде освојување на Лига Европа, каде Јувентус сигурно ќе се фокусира и ќе даде се од себе, но воопшто нема да биде лесно освојување на тоа натпреварување. Погба минатото коло конечно се врати на терените после повредата, па се очекува на овој меч да има поголема минутажа, а Алегри нема да може да смета само на Паредес и Милик кои се повредени.
Очекување
Вакви дерби натпревари се секогаш непредвидливи, квалитетот и формата се на страната на гостите, додека домашниот терен е на страната на Рома, а тоа е голема предност. По традиција двата тима играат натпревари со голови, па веруваме дека така ќе биде и овој пат.
Be the first to comment