Вечерва сите очи ќе бидат вперени во дуелот помеѓу Франција и Мароко после кој ќе биде познат и вториот финалист на Мундијалот во Катар.
Франција до сега ја оправда улогата на фаворит и очекувано дојде до полуфиналето, додека Мароко е најголемо изненадување на Мундијалот и стана првата африканска репрезентација која стигнала до полуфиналето.
Франција сака да ја одбрани титулата
Франција сака да биде третата репрезентација која после Италија и Бразил успеала да ја одбрани титулата светски шампион. „Петлите“ секако дека имаат квалитет за такво нешто и тоа го покажаа во досегашниот тек на Мундијалот, па поради тоа се едни од главните фаворити. Иако пред почетокот и за време на Мундијалот „триколорите“ беа покосени од повреди, сепак покажаа дека имаат голем ростер и дека можат да играат и без многу важни фудбалери. Во четвртфиналето Французите го имаа најголемиот тест до сега, но успеаа да ја победат Англија со 2:1, а според многумина тоа беше финале пред финалето. Сега за противник ја имаат репрезентацијата на Мароко, која е најголемо изненадување на Мундијалот. Франција е голем фаворит на овој меч, но сигурно ќе направи голема грешка доколку го потцени противникот. Наспроти себе имаат селекција која игра фантастично во одбрана, знае како да игра против фаворити, па на „триколорите“ сигурно нема да им биде лесно. Мбапе ќе има и мотив плус, бидејќи е во трка за „Златната копачка“, односно најдобар стрелец на Мундијалот.Дешамп ќе ги има на располагање сите фудбалери, па не се очекуваат промени во стартниот тим.
Може ли Мароко до уште едно чудо?
Мароко е вистинска сензација на Мундијалот, но повеќе не може да се смета за изненадување, бидејќи победи три европски селекции и тоа Белгија, Шпанија и Португалија, а со Хрватска одигра реми без голови. Одбраната е најсилен дел од тимот, Мароко се брани одлично и до сега прими само еден гол на Мундијалот, а притоа има организиран напад и знае како да постигнува голови. Ова за нив е историски дуел, но кога веќе стигнаа до овде сигурно нема да се задоволат и ќе се обидат да направат уште едно „чудо“. Селекторот Реграги одлично ги познава Францизите, како нивниот квалитет така и нивниот менталитет и сигурно ќе има одлична стратегија како да ги запре Мбапе и дружината. Се чини дека оваа селекција веќе полека го губи здивот и дека нема широк ростер, но сигурно нема да влезат со кренато бело знаме на овој дуел. Мароко ги собра симпатиите на многу љубители на фудбалот, па ќе има многу фанови на своја страна вечерва.
Очекување
Франција е голем фаворит, но сигурно нема да им биде лесно бидејќи Мароко игра тврдо и има одлична одбрана. Поради тоа очекуваме израмнет дуел со малку голови.
Be the first to comment