Македонија – Ерменија: Милевски нека стартува со победа над ерменците

Македонската фудбалска репрезентација во четврток ги продолжува квалификациите за пласман на СП во Катар. Во Скопје гостува Ерменија која е лидер во групата и која е најголемо изненадување во квалификациите досега.

Нова страница во репрезентативниот фудбал

Македонската фудбалска репрезентација врти нова страница во своето подглавје и тоа поради неколку причини. Игор Ангеловски е сега минато, а на негово место е досегашниот предводник на младинската фудбалска репрезентација Благоја Милевски. Освен тоа, Македонија продолжува без Горан Пандев кој се пензионираше од репрезентативните обврски, па сега после долго време ќе треба да се снаоѓаме без неговите мајстории на теренот. Милевски, ќе си донесе и промени во фудбалската филозофија, во поставеноста, а веќе има и играчки промени во селекцијата.

Секако дека костурот е ист, но на местото на Пандев и Тричковски тука се Јаховиќ кој с евраќа по неколку години репрезентативна пауза, како и Чурлинов. Во средниот ред ново име е Јани Атанасов, а конечно имаме и офанзивен десен бек како замена за Стефан Ристовски во името на Тодоровски. Можеби проблем имаме во средниот ред, каде Адеми е отсутен, а Николов не е во натпреварувачки ритам, но затоа тука се Барди, Елмас, Спировски, Костадинов …

Милевски е креаторот на оваа селекција

Милевски многу добро ги знае најголемиот дел од репрезентативците. Па тој беше човекот кој ги дигна во фудбалските големини со пласманот на младинското Европско првенство, па на некој начин Сер Боби е човекот од кого стартуваше најголемиот фудбалски успех. Сега, само два месеци од Европското Првенство каде бевме дебитанти продолжуваме со Ерменија против која се навикнавме да играме во речиси секој квалификациски циклус. Против ниту една друга селекција немаме одиграно толку натпревари како против Ерменија – вкупно 10. Имаме израмнет скор, со по четири победи и две ремија. Минатата година во Лигата на Нации дома славевме со 2:1, за потоа во решавачкиот дуел да доживееме пораз од 1:0. Тогаш Македонија играше со крпен состав и без неколку стандардни репрезентативци, но повторно бевме подобри на теренот и покрај поразот.

Сега, под водство на Милевски и на домашен терен, мораме да славиме победа. По победите над Лихтенштајн и Германија и поразот од Романија, овој меч може да с епокаже како клучен во борбата за пласман на првите две позиции.

Ерменија перфектна, но со проблеми во Скопје

Ерменија е најголемото изненадување овие квалификации. Влегоа како аутсајдери во групата, но по три кола се наоѓаат на лидерското место со максимални девет бода. Славеа над Лихтенштајн на гости, како и дома против фаворитите Исланд и Романија. Се наоѓаат во фудбалска еуфорија и најавуваат дека овој меч во Скопје е најважен за нив досега.

Но во исто време се соочуваат со проблеми. На овој меч нема да игра стандардниот напаѓач на првите три меча Бриаско од Бока Јуниорс кој е повреден. Суспендирани се тројца фудбалери и тоа поранешниот играч на Вардар – Барсегијан, еден од најдобрите бекови – Харојан од Кадиз, како и играчот на Ростов од средината – Бајрамјан. Единствена позитива во Ерменија е враќањето во составот на Михтаријан, кој секако дека може да ја направи разликата на теренот.