Македонија гостува кај фаворитот број еден во групата за пласман на Светското Првенство во Катар. Германија во Дуизбург ќе ги пречека македонските фудбалери и ќе оди на трета победа во низа, откако во првите две кола славеше над Исланд дома и Романија на гости.
Нема што да се загуби во Дуизбург
Македонија остана без бодови во Романија при поразот од 3:2, но не разочара. Можеме да жалиме што на тој меч не освоивме барем бод. Но македонските фудбалери се вратија брзо и на најдобар можен начин. Славеа во Скопје со 5:0 над Лихтенштајн за стартна победа во квалификациите. Она што е најважно, Ангеловски успеа на добар начин да ги изротира фудбалерите, па оние најкористените добија шанса за одмор против Лихтенштгајн во вториот дел. Тоа значи дека лекцијата од минатиот собир е научена, па сега трите меча во само седум дена ги организиравме многу подобро со што се зачува свежината за ова тешко гостување во Германија.
Адеми и Велковски ќе бидат стартери
Добро знаеме која е Германија и факт е дека Македонија шансата треба да ја гледа во дуелите со Ерменија, Исланд и Романија. Но доколку се укаже шанса и се освои барем бод во Дуизбург, тогаш сите опции до крајот ќе останат во игра, а Македонија ќе добие полетност, самодоверба и мотив пред Европското Првенство и продолжувањето на квалификациите.
Ангеловски го знае веќе составот и голема е веројатноста Адеми и Велковски конечно да стартуваат од првата минута. Тоа значи Димитриевски на голот, во одбраната Муслиу, Бејтулаи (Ристевски) и Велковски. По бочните позиции јасно е дека ќе играат Алиоски и Ристовски, додека во средниот ред Адеми, Барди и Елмас. Покрај Пандев, во нападот треба да се најде и Трајковски кој постигна три гола за Македонија на првите два меча.
Германија не знае за пораз во квалификации веќе 20 години
За Германија квалификациите без разлика дали за ЕП или за СП, се само рутина веќе долги години. И во оваа група се очекува да бидат први, особено што веќе славеа над Исланд и Романија. Германија не знае за пораз дома уште од квалификациите за СП од 2001 година, односно кога беа победени од Англија со 1:5. Воедно, тоа е последниот пораз во сите квалификациски мечеви за Мундијалите. Тогаш завршија на второто место во групата, но обезбедија пласман на Мундијалот во Јапонија и Јужна Кореја каде играа во финалето. Последен пат ремизирале со Шведска играјќи 4:4 во 2012 година.
Лев не ја потценува Македонија
Се очекува Германија да направи неколку измени во составот за дуелот со Македонија бидејќи во претходните два меча, против Исланд и Романија играа со идентичен состав.
Лев најави дека тоа не значи потценување на Македонија, туку освежување на составот на Германија.
„Имам чувство дека Македонците не се даваат лесно против никого. Тие не се нималку послаби од Романците. Ќе треба да ја покажеме вистинската сила за да победиме“, вели Лев.
Веќе се знае дека Ноер ќе биде на клупата, а негово место на голот ќе се најде Тер Штеген. Ако им веруваме на германските медиуми, во одбраната ќе се најдат Гинтер, Рудигер, Клостерман и Чан. Во средината ќе играат Химик, Горетска и Гундоган кој се очекува да ја има капитенската лента, а во нападот двоецот на Баерн Минхен Сане и Гнабри заедно со еден од фудбалерите на Челзи – Хавертц или Вернер.
Be the first to comment