Во моментов една од екипите со најдобра форма во најдобрите лиги во Европа – Лацио, патува на Џузепе Меаца кај Интер.
„Нероазурите“ ќе се обидат брзо да го надминат разочарувањето од полуфиналето на Копа Италија во текот на неделата, додека нивните посетители сакаат да остварат седма последователна победа во лигата.
Конте целосно посветен на титулата
Откако претрпе елиминација во Купот во текот на неделава од лутиот ривал Јувентус и отпадна од европските натпреварувања уште пред Божиќ – второпласираниот Интер сега има само една цел Скудетото.
Антонио Конте и претседателот на Јуве, Андреа Ањели ги зграбија насловите во медиумите по натпреварот во Купот со различни звучни навреди кои пристигнаа од двете страни по последниот свиреж. Врската помеѓу двојката се распадна летото 2014 година кога Конте, кој имаше освоено три титули во Серија А по ред со торинскиот гигант, понуди оставка.
Инцидентот во вторникот го означи последниот во низата карактеристични испади и само го истакнува притисокот под кој се соочува Конте, за да не помине уште една сезона која ќе заврши без трофеи за Интер.
Како и да е, „нероазурите“ се на само два бода помалку од Милан, кој синоќа доживеа пораз од просечната Специја, па ова на крај испадна неверојатна можност за Интер, кој со победа ќе го преземе лидерското место во Серија А.
Интер има серија од четири последователни дуели во Серија А без примен гол и тоа ќе биде адутот против Лацио. Тука секако ќе биде и огромната мотивација по поразот на Милан од Специа.
Лацио и Имобиле рушат рекорди
Уште еден гол на Чиро Имобиле, се покажа како доволен за Лацио да го совлада Каљари минатата недела, со што тимот продолжи да напредува на табелата во Серија А.
„Златната копачка“ ја погоди мрежата на осум од неговите последни десет натпревари, додека Милинковиќ-Савиќ на четирите погодоци оваа сезона, додаде и бројка од шест асистенции. Јасно е дека све во Лацио се врти околу овие двајца фудбалери.
Имобиле има шанса на гости кај Интер да го постигне својот 150-ти гол во Серија А. Тој би можел да стане најбрзиот што достигнал ваква бројка (во 245 настапи).
Има уште еден рекорд поврзан со Лацио. Дури и во ретки прилики кога Имобиле не успеваше да даде гол, Лацио постигнуваше голови. Сезонава, Лацио не постигна гол на само еден меч и тоа уште во четвртото коло кај Сампдорија. Имаат постигнато гол на 17 натпревари во лигата – последен пат ваква серија тиот имал и во 1994 година. Фудбалерите на Лацио исто така се здобија со повеќето лигашки бодови од која било друга екипа во 2021 година и се единствената екипа без пораз оваа календарска година.
На само уште една недела до продолжување на Лигата на шампионите со жестокиот судир против Баерн Минхен, работите за Лацио изгледаат доста добри.
Be the first to comment