Денес во фокусот ќе биде големото дерби во четвртфиналето од Лигата на шампиони помеѓу Реал Мадрид и Манчестер Сити.
Ждребот сакаше двата најголеми фаворити за трофејот да ги одмерат силите во четвртфиналето. Реал Мадрид и Манчестер Сити во изминатите години имаа неколку антлогиски пресметки, па сите очи на фудбалска Европа вечерва ќе бидат вперени на „Сантиаго Бернабеу“.
„Кралот“ спрема одмазда за „граѓаните“
Лигата на шампиони е во ДНК на Реал Мадрид и „кралевите“ секоја година атакуваат на најпрестижниот трофеј. И оваа сезона се еден од најголемите фаворити во Лигата на шампиони, а тоа го потврдија со игрите во групната фаза. Тимот на Анчелоти се наоѓа во одлична форма, а полека се решава проблемот со повредени фудбалери. Во осминафиналето го елиминираа Лајпциг, малку потешко од очекувањата, но тоа потврдува дека во елиминациите во ЛШ нема лесни натпревари. Ова е секако финале пред финалето, а тимот на Анчелоти имаат нерасчистени сметки со „граѓанте“ од минатата сезона. Сити минатата година со високи 4:0 го понижи Реал Мадрид на „Етихад“ и се пласираше во финалето, а подоцна и го освои трофејот. Тоа сигурно ќе биде додатен мотив за „кралевите“ кои ќе сакаат да ја искористат предноста од домашен терен и да обезбедат предност пред реваншот.
Сити сака одбрана на титулата
Манчестер Сити минатата сезона испиша историја и за прв пат ја освои Лигата на шампиони, а на патот до тронот мораше да го совлада „кралот“. Сити неколку сезони одигра легендарни дуели со Реал и обично победникот од тие дуели на крајот го креваше престижниот пехар. Целта на „граѓаните“ повторно е иста, но овој пат ќе биде многу потешко да се одбрани трофејот. Гвардиола пред овој меч има големи кадровски проблеми, особено во одбраната каде нема да може да смета на Вокер, Гвардиол и Аке, па тоа сигурно ќе биде голем хандикеп. Секако најголем адут се Халанд и Де Бријне, кои ќе им задаваат големи главоболки на „кралевите“. Целта е да се оствари добар резултат во Мадрид и да се остане непоразен на „Сантиаго Бернабеу“, па пласманот во следната фаза да се решава на „Етихад“.
Очекување
Дуелите на овие два тима се секогаш неизвесни, возбудливи, но и богати со голови, па веруваме дека така ќе биде и овој пат.
Be the first to comment