Денес започнуваат полуфиналните пресметки во Лигата на шампиони, а во фокусот секако ќе биде дуелот помеѓу Реал Мадрид и Манчестер Сити.
Ова е реприза од минатогодишното полуфинале кое донесе многу возбудувања, а на крајот Реал излезе како победник, па сега Сити сака да се одмазди.
Реал никогаш не треба да се отпишува во ЛШ
Реал Мадрид има посебна традиција во Лигата на шампиони и овој тим е како создаден за големи натпревари. И покрај фактот што не игра добро во Примара и заостанува од лидерот Барселона, сепак Реал никогаш не смее да се отпише во ЛШ. Притоа, Анчелоти е тренер кој фантастично ги води своите тимови во завршницата, а тоа го покажа многу пати до сега. Реал во осминафиналето лесно се справи со Ливерпул и запиша две победи, а потоа во четвртфинале без поголеми проблеми се справи со Челзи. Сега повторно ќе игра против англиски клуб и тоа исто како минатата сезона против Манчестер Сити. „Кралевите“ повторно се аутсајдери против „граѓаните“ според букмејкерите, но Реал никогаш не треба да се потцени во завршницата на ЛШ. Тоа најдобро го покажа фактот минатата сезона кога се извлече од бездна, а на крајот го крена трофејот. Тимот на Анчелоти во одлична атмосфера во пречекува Сити откако пред три дена го освои Купот на кралот. Кога е во прашање тимот, покрај повредениот Менди, Анчелоти нема да може да смета и на Милитао, кој е под суспензија.
Манчестер Сити сака одмазда
Не е тајна дека главна цел на Манчестер Сити и оваа сезона е трофејот во Лигата на шампиони. Иако веќе неколку години со ред важи како фаворит во најелитното натпреварување, сепак Гвардиола никако да го направи конечниот чекор. Сега ждребот повторно ги спои со Реал Мадрид, па тоа е можност за одмазда на „граѓаните“ и секако мотив повеќе. Меѓутоа, за разлика од претходната година сега Сити во тимот го има Халанд, кој е најдобар стрелец во Европа и сигурно голема предност за англискиот тим. Овој двомеч доаѓа во одличен момент за Сити кој е во фантастична форма и се искачи на врвот на Премиер лигата, а стигне и до финалето во ФА Купот. Сепак, ова за Гврадиола и дружината е натпревар на сезоната, бидејќи знаат дека ова е најголемата пречка до остварување на најголемата желба. Во четвртфиналето Сити неочекувано лесно го елиминираше Баерн Минхен, па со право е најголем фаворит за титулата. Кога станува збор за тимот, Гвардиола за овој меч нема да може да смета само на Аке.
Можни состави:
Реал Мадрид: Куртоа, Карвахал, Рудигер, Алаба, Камавинга, Чуамени, Крос, Модриќ, Валверде, Винисиус, Бензема.
Манчестер Сити: Едерсон, Аканжи, Дијаз, Стоунс, Вокер, Грилиш, Родри, Гундоган, Де Брујне, Бернардо Силва, Халанд.
Очекување
Ова е дефинитивно натпревар кој е тешко да се предвиди, но со оглед на фактот дека играат две квалитетни екипи кои преферираат отворен фудбал, очекуваме голови на двете страни.
Be the first to comment