Денес има многу дерби натпревари ширум Европа, а секако едно од најважните се игра во Рим, помеѓу Рома и Лацио, кое е едно од најголемите градски дербија во светот.
Ова дерби добива повеќе на тежина бидејќи двата тима моментално се во горниот дел на табелата и разликата помеѓу нив е само еден бод. Исходот од ова дерби многу ќе влиае во понатамошниот дел од сезоната на двата тима.
Може ли Рома да се замеша во борбата за титулата?
Рома минатата сезона дојде до првиот европски трофеј во својата историја, но сепак целта на клубот е што побрзо да се врати во Лигата на шампиони. После големите летни засилувања, ако Мурињо не успее да ја донесе „волчицата“ во Топ 4 ќе биде голем неуспех. После 12 одиграни кола оваа сезона Рома се наоѓа на четвртото место на табелата, но со победа во овој меч ќе се искачи на третото место и ќе ја покаже својата кандидатура за титулата. Минатото коло иако играа неубедливо, избраниците на Мурињо дојдоа до важен триумф на гостувањето кај Верона и така ја продолжија добрата серија. Рома на последните пет меча запиша четири победи, па сигурно во добро разположение го дочекува овој меч. Исто така во Лигата на Европа ја остварија својата цел и се пласираа во нокаут фазата. Што се однесува до кадровските решенија, Мурињо за овој меч нема да може да смета на повредените Дибала, Вајналдум и Спинацола.
Може ли Лацио без двајцата најдобри фудбалери?
Од година во година Лацио се обидува да дојде до Лигата на шампиони, но тоа не им оди од рака, па примарна цел и оваа сезона е пласман во Топ 4. Тимот на Сари добро ја почна оваа сезона и моментално е на 5-то место, со само бод помалку од градскиот ривал. Со оглед на неочекуваниот пораз од Салернитана на „Олимпико“, сега лацијалите немаат право на кикс и пораз во дербито може сериозно да ги поремети плановите и тимот да влезе во летаргија. Во Лига Европа не успеаа да се изборат за нокаут фаза, па сега ќе се насочат само на Серија А, бидејќи играњето во Лигата на конференции не е приоритет. Голем хендикеп за Лацио секако ќе биде отсуството на Сергеј Милинковиќ Савиќ, кој е под суспензија поради жолти картони. Ако се земе предвид дека Имобиле е повреден од поодамна, Лацио ќе биде сериозно ослабен во овој меч. Исто така ова ќе биде сериозен тест за Сари, кој треба да покаже дека не зависи од овие двајца фудбалери.
Очекување
Рома и Лацио по традција играат возбудливи натпревари каде резултатот е поважен од играта. Со оглед на тоа дека двата тима ќе играат за победа, очекуваме голови на двете страни.
Be the first to comment