Денес на програмата се натпеварите од нокаут фазата од Лига Европа, а во фокусот секако ќе биде големото дерби на „Камп Ноу“ помеѓу Барселона и Манчестер Јунајтед.
Ова е дуел на два европски гиганти на кои сигурно местото им е во Лигата на шампиони, но играњето во Лига Европа е резултат на слабиот период кој е зад нив. Сега двата тима се во одлична форма и сигурно во ова натпреварување важат како главни фаворити.
Барселона сака триумф во Европа
Барселона лошо ја отвори европската сезона оваа година и беше елиминирана во групната фаза од Лигата на шампиони. За волја на вистината Каталонците беа во многу тешка група, но секако дека очекувањата беа многу поголеми, особено откако во летниот преоден рок пристигнаа големи засилувања. Меѓутоа, како што одминува сезоната Барса игра се подобро и моментално е лидер во Примера со 8 бода предност пред Реал Мадрид. Пирмарна цел е секако враќање на титулата во Шпанија, но Чави ќе се обиде да стигне и до европски трофеј. Сега на патот има многу тешка препрека, која ако ја помине може да има лесен пат до самото финале. Ова е дуел на двата најголеми фаворити во натпреварувањето, па штета е што се сретнаа во раната фаза, а место во осминафиналето има само за еден. Чави нема да тактизира и ќе излезе со најсилниот тим, но и самиот е свесен дека ова е двомеч и дека се ќе се решава во реваншот. Поради тоа Каталонците нема да тргнат безглаво, но секако ќе се обидат со предност да патуваат на „Олд Трафорд“.
Тен Хаг го препороди Манчестер Јунајтед
Манчестер Јунајтед оваа сезона конечно постигнува резултати какви што му доликуваат на реномето на овој клуб. Секако, примарна цел на тимот ќе биде обезбедување пласман во Лигата на шампиони следната сезона, но „црвените ѓаволи“ сакаат сезоната да ја завршат со трофеј. Иако малкумина го очекуваа тоа, сепак Јунајтед е се уште во ситуација да се замеша за титулата во Премиер лигата, иако тоа е малку веројатно во овој момент, но секако дека ваков клуб не смее да се отпише. Групната фаза „црвените ѓаволи“ ја поминаа без поголеми проблеми, но немаа среќа во ждребот па го добија најсилниот противник. Тоа може да се гледа и од позитвна страна, мотивот е поголем, бидејќи дуелите со Барселона се секогаш голем престиж. Тен Хаг комплетно го промени лицето на тимот, „црвените ѓаволи“ играат на победа во секој меч и се во одлична форма во моментов. Иако се свесни дека постои реванш на „Олд Трафорд“, сепак „црвените ѓаволи“ ќе се обидат со што подобар резултат да се вратат дома. Ова е клуб кој секогаш сака да победува, па сигурно ќе се обиде да победи уште во првиот меч. Кога станува збор за тимот, Тен Хаг има многу проблеми бидејќи Антони, Ериксен и Марсијал се повредени, додека Мартинез и Сабицер се под суспензија.
Очекување
Дерби натпреварите се секогаш неизвесни, а бидејќи станува збор за двомеч, сепак се очекува двата тима да калкулираат и да не тргнат безглаво. Сепак, станува збор за два тима кои играат офанзивен и отворен фудбал, па очекуваме голови на двете страни.
Be the first to comment