Денес централен фудбалски натпревар секако ќе биде натпреварот од италијанскиот Суперкуп помеѓу миланските гиганти Милан и Интер.
Актуелниот шампион Милан ќе ги одмери силите со освојувачот на Купот, Интер и ова миланско дерби за важен трофеј ќе се игра во Саудиска Арабија.
Милан долго чека на овој трофеј
Милан цели 11 години чека на овој трофеј, кој во последно време има голема важност во италијанскиот фудбал. Последен пат „росонерите“ го освоија Суперкупот во 2011 година, кога беа подобри од Интер со 2:1. Актуелниот шампион оваа сезона не игра според очекувањата во Серија А и заостанува цели 9 бода зад лидерот Наполи, кој пак игра фантастична сезона. „Росонерите“ исто така беа елиминирани во осминафиналето од Купот, па ова е единствена шанса за трофеј на тимот на Пиоли оваа сезона. Добра вест е што Милан оваа сезона игра одлично во големите дерби натпревари и има само пораз од Наполи. Во првиот дел од сезоната беше супериорен над Интер и победи со 3:2, иако „нероаѕуроте“ брзо дојдоа во водство. Пиоли веќе подолго време има проблем со повредени фудбалери, а добрата вест е што за овој дуел се опоравија Ребиќ, Кјаер и Ориги, па ќе бидат на располагање. Важноста на натпреварот секако е голема бидејќи се игра за трофеј, а тоа што се игра против градскиот ривал го прави овој меч уште поважен.
Интер игра топло-ладно оваа сезона
Интер оваа сезона игра топло-ладно и заостанува цели 10 бода зад лидерот Наполи, па тешко дека ќе може да се замеша во битката за Скудетото. Во првиот меч од годината Интер одигра фантастично и го победи Наполи, па се чинеше дека сигирно ќе се бори за титулата, но потоа следуваше кикс против Монца. Меѓутоа, натпреварите со Милан се секогаш специјални за „нероаѕуроте“ и моменталната форма не игра голема улога, бидејќи мотивот е огромен. Интер сака да му се одмазди на градскиот ривал за изгубеното Скудетото минатата сезона и ќе направат се за да дојдат до трофејот. Интер минатата сезона освои две титули, па сега има шанса да ја брани титулата во Суперкупот. Инзаги нема проблем со повредени играчи, Брозовиќ се врати на терените, а последните информации велат дека Чалханоглу ќе биде спремен за игра. Неизвесен е само настапот на Лукаку, кој ја обнови повредата.
Очекување
Олекуваме неизвесен меч кој ќе го одлучуваат детали, а лесно може победникот да биде решен после продолженија или пенали. По традиција миланските дербија се секогаш богати со голови, па очекуваме така да биде и овој пат.
Be the first to comment