Со Истанбул во мислите, Манчестер Сити е убеден дека е подготвен за реваншот од нивната полуфинална пресметка во Лигата на шампионите со ПСЖ на „Етихад“ во Англија.
Избраниците на Пеп Гвардиола славеа со 1:2 на „Паркот на принцовите“, во еден крајно израмнет натпревар, но тој резултат не е гаранција за победа во двомечот.
Пеп е очаен да го види Истанбул на 29-ти Мај
Откако конечно ја помина бариерата ( трите последователни испаѓања од четвртфиналето ), Гвардиола гледа кон 29-ти Мај и Олимпискиот стадион Ататурк – истото место каде што Ливерпул го направи познатото „Чудо од Истанбул“. Сити веќе ја има и титулата во Премиерлигата, а викендов рутински славеа над Кристал Палас.
Пеп е очаен да го освои трофејот во Лигата на Шампиони. После толку многу вложувања, овој трофеј е најпосакуван и за него и за сопствениците на Сити. Особено еден човек – Серхио Агуеро – не би сакал ништо повеќе од тоа да ги стави рацете на најценетиот сребрен сад во Европа пред да се збогува со Сити.
Повторно, нападот може да биде најдобрата одбрана за Сити, кој постигна најмалку два гола на секој од последните шест натпревари во Лигата на шампионите, а Гвардиола можеше да си дозволи да им даде целосен одмор на дел од своите фудбалери за време на викендот. Токму свежината, би требало да биде најголема предност за нив на овој меч.
Тимот на Гвардиола сепак мора да одигра уште подобри 90 минути за да го резервира своето место во финалето, но во претходните 47 наврати кога англиските клубови победувале на првиот натпревар од европските купови на гостински терен, тие се пласираа во следната фаза 47 пати – податок што воопшто не треба да биде занемарен пред еден вака важен натпревар.
ПСЖ одигра подобро на гости, отколку дома сезонава во ЛШ
Покетино веќе доживеа големи потреси во Лигата на шампионите низ годините со Тотенхем. Аргентинецот мора да најде начин да го инспирира ранетиот ПСЖ на „Етихад“. Она што важеше за Сити, важи и за ПСЖ. Арапските милиони вложени во тимот, мора да го донесат трофејот кој фали во витрините на клубот. Но ако во минатите сезони ПСЖ беше целосно насочен кон Лигата на Шампиони во оваа фаза од сезоната, сега тоа не е случај. Тие се навикнаа да ја освојуваат домашната титула во Лига 1, многу порано. Сепак, во моментов се втори на табелата со еден бод помалку од Лил на само три кола до крајот на сезоната.
ПСЖ успеа да се врати по поразот од 2:1 во првиот натпревар и да ја исфрли Борусија Дортмунд од минатосезонскиот турнир во осминафиналето, но тие сега имаат дупло потешка задача.
Сепак, ПСЖ е во серија од 10 победи на последните 10 гостувања во сите натпреварувања – серија што ги вклучува нивните историски победи на „Камп Ноу“ и „Алијанц Арена“ – и шест од последните седум натпревари во Лигата на шампионите надвор од Париз.
Be the first to comment