Сезоната 2017-18 во НХЛ Хокеј лигата на САД, конечно стартуваше. Летната пауза беше долга, а некои тимови тоа добро го искористија за да ги засилат своите екипи, но некои беа премногу пасивни за време на одморот. Тимовите како Колумбус и Торонто беа едни од најголемите изненадувања минатата година и според нивните активности во предсезоната, ќе можеме да очекуваме од нив уште повеќе оваа сезона, а Острон Метјуз, Конор МекДавид, Џек Ајхел и Патрик Лајн ќе продолжат да ја предводат новата генерација на НХЛ, меѓу старите ѕвезди како Овечкин, Крозби, Карлсон и Џонатан Тоус.
ИСТОЧНА КОНФЕРЕНЦИЈА
АТЛАНТИК ДИВИЗИЈА
Тампа Беј сезонава ќе се врати на голема врата во НХЛ лигата, по разочарувачката мината сезона. Минатата сезона Стивен Стамкос не играше поради повреда на коленото, а на негово место се најде Никита Кучеров кој пак стана еден од најдобрите играчи и тоа не само во тимот туку и во лигата. Ако и двајцата се здрави оваа сезона, ќе треба да се внимаава многу на нив и тие ќе бидат ударна сила на овој тим. Андреј Василевски беше малку несигурен во својата прва сезона како голман број 1, но словакот Петар Будај беше солиден, со што овој тим е добро покриен на голманската позиција. Проблемите со повредите се надминати, а тоа е доволен знак за позавачите на хокејот во САД да им препуштат една од фаворитгските улоги сезонава на Тампа Беј.
Монтреал минатата сезона беше одличен и заврши на првото место во оваа дивизија. Ова се должеше речиси целосно поради голманот Кери Прајс кој бранеше одлично токму во моментите кога тоа беше најпотребно. Џонатан Дроин дојде летово од Тампа Беј и од него можеме да очекуваме многу оваа сезона заедно со Филип Данаулт и Ендру Шо кои веројатно ќе бидат во првите шест. Монтреал сепак се уште нема длабочина и нема вистински замени за најдобрите во првиот тим и тоа и оваа сезона ќе биде голем проблем за нив.
МЕТРОПОЛИТАН ДИВИЗИЈА
Се разбира дека од оваа дивизија доаѓа најголемиот фаворит оваа сезона и тоа тимот на Питсбург кој сезонава ќе ја брани шампионската титула во НХЛ лигата и тоа втора година по ред. Без разлика што сезонава за нив стартуваше очајно, тоа според играчите кои ги поседува овој тим не мора дазначи ништо. Сепак сезонава постои голема дупка во тимот по заминувањето на Ник Бонино во тимот на Нешвил, но ако Крис Летанг и Евгени Малкин останат здрави, тие повторно можат да се кандидираат за трета последователна титула бидејќи имаат широк состав и голем квалитет, пред се во нападот. Не смееме да заборавиме дека во овој тим лидер е најдобриот хокејар на сите времиња Сидни Кросби.
Најголемиот ривал на Питсбург во Атлантик дивизијата, но и во целосната Источна конференција е Вашингтон. Оваа сезона овој тим ќе ја бара својата трета среќа. Имено, предходните две сезони Вашингтон завршуваше на првата позиција во конференцијата, но во плеј-офор на два пати Питсбург успеваше да ги надмине и ја освојуваше титулата. Тимот е речиси непроменет од минатата сезона, што значи дека и овој пат Вашингтон ќе игра голема улога во НХЛ, но тоа многу ќе зависи и од големиот Овечкин кој минатата сезона постигна 33 гола и 36 асистенции, но во последно време се чини дека има пад во формата.
ЗАПАДНА КОНФЕРЕНЦИЈА
ЦЕНТРАЛНА ДИВИЗИЈА
Минесота е главен тим во Централната дивизија. Тренерот Брус Будро значи загарантирани од 100 бода во регуларната сезона, а со тоа и загарантиран плеј-оф. Прашањето е: Дали конечно ова ќе биде сезоната за паметење на Минесота ? Будро има тим да го направи тоа, со длабок тим и широк ростер на напаѓачи, по два солидни одбранбени парови и одличен голман во Деван Дубник. Ако не успее Минесота сега, тогаш кога?
Нешвил едвај стигнаа до плеј-офот минатата сезона, а потоа го направија најголемото изненадување и стигнаа до финалето. Сепак сезонава ќе им биде многу потешко да го повторат тоа, иако имаат солиден тим. Еден од нивните најдобри одбранбени играчи, Рајан Елис, ќе биде надвор од тимот неколку месеци поради повреда на коленото, конкуренцијата на тимот не е на завидно ниво, а голманот Пека Рине не е во најдобра форма.
ПАЦИФИЧКА ДИВИЗИЈА
На Пацификот главен е Анахејм. Кореј Пери имаше лоша сезона и тоа беше најголем проблем за овој тим минатата сезона, но сега Пери игра одлично, барем во предсезоната и доколку продолжи со тие игри и понатаму, Анахејм ќе биде конкурентен против било кој тим во НХЛ лигата. Сепак постои уште еден проблем. Рајан имаше операцијата и сеуште не се знае кога ќе се врати на теренот, а тоа е многу важно за амбициите на тимот оваа сезона.
Едмонтон е вториот фаворит на Пацификот. Овој тим миатата сезона стигна до четвртфиналето, каде беше елиминиран токму од Анахејм и сезонава е решен да направи поголем чекор. Овој пат Едмонтон е многу повеќе од Конор МекДавид кој беше неприкосновен минатата сезона. Германецот Леон Драсаитл прерасува во ѕвезда, а Камерон Талбот докажа дека може да биде прв избор на голманската позиција па сега овој тим има два одлични голмани. Според се очекувањата се дека Едмонтон ќе има уште една сезона со над 100 бода во регуларниот дел.
Be the first to comment